О́kinishke oraı qazir naýqastardyń sany alty júzden asyp otyr. Jýrnalısterge brıfıng bergen oblystyq densaýlyq saqtaý basqarmasy bastyǵynyń mindetin atqarýshy Nurlan Aımanov derttiń damýynyń eń negizgi sebebi adamdardyń bir-birine tym jaqyn kelýi, betperdeni júıeli taqpaýy, qoldy taza jýmaýynan degenimen syrttan kelgenderden juǵý kóbeıe túsýde. Qazir ándet juqtyrǵandardyń 232 sımptomdy, 381 sımptomsyz kórinedi. Sońǵy aptadaǵy derttilerdiń ósimi 76 paıyzǵa jetken. Bul óte alańdatarlyq jaǵdaı.
Tótenshe jaǵdaıdyń kezinde kóshelerge dızenfeksııa jasap KamAZ-dar júretin edi, qazir olardyń sany da azaıyp ketken. Avtopatrýlderge deıin adamdardy toqtatyp, betperde kııýin talap etetin, qazir shekteýler azaıtylǵannan beri ondaılar múlde joǵaldy. Esesine naýqastar sany kóbeıip barady.
Qazir oblystyń Aqjar, Aıyrtaý, Taıynsha, Ýálıhanov aýdandaryna barý, kelýge shekteý qoıyldy. Sondaı-aq Shal aqyn aýdanyndaǵy Jańajol, M.Jumabaev aýdanyndaǵy "Taman dıvızııasy" atyndaǵy aýyldar jabyldy. Petropavl qalasynda aýrý oshaǵy tabylǵan tórt balabaqsha, eki balalar alańy jáne bir fıtnes klýb jabyldy.
Nurlan Aımanovtyń aıtýyna qaraǵanda dárigerler qoldan kelgen kómekterin jasap jatyr, naýqastarǵa oryn jetkilikti. Jýyrda ǵana óte aýyr jaǵdaıda túsken bir áıel adam tolyq emdelip shyqqan. Naýqastarmen tikeleı kontaktyda bolǵan 45 medısınalyq qyzmetkerdiń boıynan da vırýs tabylyp, emdelýge jiberilgen. Sóziniń sońyn ol optımıstik senimmen, jaǵdaıdyń baqylaý sheńberinen shyqpaǵanyn jetkizdi.
Soltústik Qazaqstan oblysy
