Foto: Ashyq derekkóz
Sot prosesin BAQ ókilderiniń qatysýynsyz ótkizý týraly ótinish bildirgen ol marqumdardyń týystarynan keshirim surap, óz kinásin moıyndaýǵa daıyn ekenin aıtty.
«Jábirlenýshi taraptan keshirim suraımyn. Sizderge óz kómegimdi aıamaýǵa daıynmyn. Eshqandaı sóz sizderge kómektese almaıtynyn bilemin, ár otbasyǵa qaıǵy ákelgenimdi de túsinemin. Zańǵa saı jazamdy alýǵa daıynmyn», dedi sottalýshy.
Prokýrordyń málimetinshe, júrgizýshi apat kezinde jeńil dárejede mas bolǵan. Sonymen qatar ol jalǵan nómir taǵylǵan Zeekr kóligimen 219 km/saǵ jyldamdyqpen qarsy baǵytqa shyǵyp ketken. Sotta jábirlenýshi taraptyń advokaty Meıirman Shekeev moraldyq shyǵyn retinde 100 mln teńge kóleminde talap qoıýy múmkin ekenin jetkizdi.
«Qorǵaýshy retinde 100 mln teńge suraımyn. Zań boıynsha jazasy 7-10 jyl aralyǵynda alady. Alaıda ol kisi abaısyzda adam óltirdi degen bappen saralanyp otyr. Sosyn ol jazasyn qatań túrdegi túrmede emes, kolonııa sanatyndaǵy túrmede, ıaǵnı jeńil sanatty túrmede óteıdi», dedi advokat.
Buǵan deıin atyshýly «Sherzat isine» aralasqan qorǵaýshy qaza tapqan qyzdardyń biriniń atyndaǵy nesıeni áli de ata-anasy tólep otyrǵanyn aıtty.
Ál-Farabıdegi 3 adamnyń ómirin qıǵan jol apatyna qatysty tergeý qashan aıaqtalady?
Eske salaıyq, qaıǵyly jol apaty 21 naýryzǵa qaraǵan túni Almatydaǵy ál-Farabı dańǵylynda bolǵan. Apat saldarynan Mercedes júrgizýshisi jáne kóliktegi 20 jáne 22 jastaǵy eki qyz qaza tapty.
