Qujatqa EUÝ rektory Erlan Sydyqov pen BSSA rektory Vıttorııa Idrısova qol qoıdy. Qol qoıý rásimi Búkilreseılik syrtqy saýda akademııasy delegasııasynyń L.N. Gýmılev atyndaǵy Eýrazııa ulttyq ýnıversıtetine resmı sapary aıasynda ótti. Kezdesý Reseı Federasııasy Prezıdenti Vladımır Pýtınniń Qazaqstan Respýblıkasyna memlekettik saparyna oraı uıymdastyrylyp, joǵary bilim men ǵylym salasyndaǵy qazaqstandyq-reseılik yntymaqtastyqty nyǵaıtý aıasynda uıymdastyryldy. Taraptardyń atap ótýinshe, bul kelisim bilim jáne ǵylym salasyndaǵy halyqaralyq áriptestikti damytýdaǵy mańyzdy qadamdardyń biri boldy.
Kezdesý barysynda taraptar akademııalyq utqyrlyqty damytý, birlesken bilim berý baǵdarlamalaryn júzege asyrý, ǵylymı zertteýler júrgizý jáne halyqaralyq jobalardy qoldaý máselelerin talqylady. Sondaı-aq qos dıplomdy baǵdarlamalardy iske qosý, professor-oqytýshylar quramynyń tájirıbe almasýy jáne jas ǵalymdardy qoldaý baǵytyndaǵy yntymaqtastyqty keńeıtýge erekshe nazar aýdaryldy.
EUÝ rektory Erlan Sydyqov óz sózinde eki eldiń joǵary oqý oryndary arasyndaǵy baılanystardyń turaqty túrde damyp kele jatqanyn atap ótti.
«Reseıdiń jetekshi joǵary oqý oryndarymen áriptestigimiz júıeli túrde jalǵasyp keledi. Búginde kóptegen stýdentterimiz Máskeý, Novosıbırsk, Omby sııaqty iri ǵylymı-bilim berý ortalyqtarynda bilim alyp júr. Bul baılanystar jastardyń kásibı tájirıbe jınaqtaýyna jáne halyqaralyq deńgeıde básekege qabiletti maman bolyp qalyptasýyna múmkindik beredi. Aldaǵy ýaqytta bul seriktestik eki eldiń bilim jáne ǵylym salasyndaǵy yntymaqtastyǵyn jańa deńgeıge kóteredi dep senemiz», dedi rektor.
О́z kezeginde BSSA rektory Vıttorııa Idrısova memorandýmnyń eki tarap úshin de tıimdi ekenin jetkizdi.
«Eýrazııa ulttyq ýnıversıtetimen ornatylǵan seriktestikti biz joǵary baǵalaımyz. Bul áriptestik tek eki joǵary oqý orny arasyndaǵy resmı baılanys qana emes, sonymen qatar bilim men ǵylymdy damytýǵa baǵyttalǵan uzaq merzimdi strategııalyq yntymaqtastyqtyń mańyzdy bóligi. Mundaı baılanystar oqytýshylar men stýdentterge jańa akademııalyq ortada tájirıbe almasýǵa, zamanaýı bilim berý ádisterin meńgerýge jáne halyqaralyq deńgeıde kásibı quzyretterin arttyrýǵa múmkindik beredi», dedi ol.
Aıta keteıik, Búkilreseılik syrtqy saýda akademııasy – syrtqy ekonomıkalyq qyzmet salasyna mamandar daıarlaıtyn Máskeýdegi jetekshi joǵary oqý oryndarynyń biri. Akademııa 1931 jyly qurylǵan.
Búginde akademııa ekonomıka, menedjment jáne quqyqtaný baǵyttary boıynsha bakalavrıat, magıstratýra jáne aspırantýra baǵdarlamalaryn júzege asyrady. Árbir bakalavrıat baǵdarlamasynda eki shetel tilin mindetti túrde oqý qarastyrylǵan. Qazirgi tańda stýdentter aǵylshyn, nemis, fransýz, ıspan, ıtalıan, portýgal, qytaı, koreı, vetnam jáne arab tilderin meńgere alady.
Eske sala keteıik, buǵan deıin mınıstr bıyl talapkerlerge 89 myńnan astam memlekettik grant bólingenin aıtqan bolatyn.
