Májiliste qaralyp jatqan zań jobasynda Qazaqstan azamattaryna qyzmet kórsetetin sheteldik ınternet-kompanııalarǵa qun salyǵyn salýǵa múmkindik beretin normalar usynyldy.
"Google salyǵyn tóleýshiler tek sheteldik ınternet-kompanııalarǵa qatysty. Zańdy jáne jeke tulǵalar bul normaǵa kirmeıdi", - dedi Májilis depýtaty Fahrıddın Qarataev palatanyń plenarlyq otyrysynda.
Sondaı-aq Ulttyq ekonomıka mınıstri Rýslan Dálenov atalǵan norma sheteldik ınternet-kompanııalarǵa ǵana qatysty bolatynyn atap ótti.
"Bul norma qazaqstandyq salyq tóleýshilerge qoldanylmaıdy. Norma ınternet-kompanııalardyń esepke turyp, QQS tóleýine yqpal etedi. Bul halyqaralyq standarttarǵa sáıkes keledi. Sheteldik ınternet-kompanııalar osy qyzmetter men jumystar boıynsha QQS tóleýge daıyn, biraq bizde mundaı norma joq boldy. Endi zań jobasy aıasynda mundaı norma usynylady. Bıýdjettiń kiris bóliginiń ulǵaıýy boıynsha, qyzmet kórsetý kólemi úlken emes bolǵandyqtan, QQS eki mıllıard teńge kóleminde baǵalanady. Eger kórsetiletin qyzmet kólemi ósetin bolsa, tıisinshe salyq kólemi de ulǵaıady. Biz ony baqylaıtyn bolamyz", - dedi Dálenov.
