Tilshiniń úıi mobıldi stýdııaǵa aınaldy

Qolyna qalam alyp, aqparat taratýǵa asyqqan jýrnalıs­ter qaı kezde de mıssııasynan myzǵyǵan emes. Meıli órt, meıl­i apat, meıli tasqyn bolsyn sol oqıǵa ornynan dereý sapaly, senimdi aqparat taratady. Elde tótenshe jaǵdaı jarııalanyp ulttyń ımmýnıteti synalar sátte de jýrnalıs­ter shıraq qımyldap, kási­bı mindetin joǵary deńgeıde atqara alatynyn taǵy bir dá­lel­dedi. Bul ýaqytta epıde­mııalyq jaǵdaıǵa baıla­nysty eleńdegen eldiń suraǵy kóp bolǵany belgili. Halyq pen bılik arasyndaǵy dáneker retinde jýrnalıster myń saýaldy tıisti organǵa jetkizip, tolymdy habar berip otyrdy. Arasynda koronavırýs­pen kúrestiń qalyń ortasynda júrip reportaj jasa­ǵandar da bar. Sonyń biri  «Qazaqstan» Ulttyq telearnasy Jańalyqtar qyzmeti Al­maty bıýrosynyń jetekshisi Jazıra Orazqyzy jer-jahanda taraǵan juqpaly indet jaǵadan alǵanda, sát saıyn ózgergen jańalyqtardy jalpaq jurtqa jetkizý úshin jýrnalıster qaýymynyń qarbalasqa toly jumysy odan saıyn qyza túskenin aıtady.

– «Almatydan koronavırýs anyqtaldy» degen alǵashqy habar aıtylǵan kúnnen bastap jumys tártibimiz tutas ózgerdi. Áleýmettik jelilerde san túrli jańalyqtar shyǵa bastady, onyń ishinde burmalanǵany da, shyndyqqa janaspaıtyny da boldy. Onsyz da boıyn úreı men qorqynysh bılegen jurtqa resmı aqparatty der kezinde berý, saǵat saıyn habar taratý Ulttyq arnanyń bas­ty qaǵıdatyna aınaldy. Jańalyqtar qyzmetiniń júr­gizýshileri men tilshileri indet juq­tyrýymyz múmkin degen qorqynyshqa qaramastan, qyz­metine adal bolyp, abyroımen atqarýǵa tyrysty. Oqıǵa ornynan tikeleı efırler, telefon arqyly habarlaý, mańyzdy  ári sońǵy aqparatty sapaly, jyldam jetkizý  úshin tynym tappady, – deıdi ol.

Onyń aıtýynsha, mun­shalyqty kóp arnaıy shyǵa­rylymdar ádette merekelerde, aıtýly kúnderde jasalǵan bolsa, karantın kezinde aıaq astynan tikeleı efırge shyǵý úırenshikti jumysqa aınalǵan.

«Almatyda koronavırýs juq­tyrǵan alǵashqy adam tir­kel­­gen sátten bastap  600-den astam indet  oshaǵy anyq­ta­lypty. Qala ákimi B.Saǵyn­taevtyń esebinde aıtylǵandaı,  bir táýlikte 132 ınfeksııa osha­ǵy tirkelgen kezder de bol­ǵan. Túsirilim toptary indet oshaq­­taryna jaqyn barmaýǵa ty­rys­ty. Degenmen, bizdiń bas­ty qarýymyz – aqparat. Tele­kórermenderimizge saralanǵan, salmaqty, tekse­rilgen, mańyz­dy, ózekti jańalyqtardy berý úshin keıde biraz ter tógýge týra keledi. Aqparat alýdyń san alýan amaldaryn qoldanamyz. Bastysy, materıalyńdy kór­gende kórermen kókeıinde esh­qan­daı saýal, kúmán qal­maýyn oılaýymyz qajet. Qa­ýip­sizdik sharalaryn da qatań ustandyq, áli de karantın talaptaryn saq­taımyz», deıdi Jazıra Orazqyzy.

Bul qatań tártip halyqtyń birazyn úıge tyqqanmen onyń da bir qaıyry boldy. Jaqsylyq kóre bilgen adamǵa oqshaýlaý rejimi jańa múmkindikterge jol ashty. Kez kelgen jaǵdaıǵa beıim áriptesterimiz karantın kezinde óz úıin mobıldi stý­dııaǵa aınaldyryp, jańa for­matta aqparat taratýdy da úırengen. 

«Bilesiz be, jańa­lyqtar bólimi pandemııa ákelgen jańashyldyqqa da aqy­ryndap boı túzeı bastady. Bul rette jýrnalıstiń úıi mobıldi stýdııaǵa aınalǵany bar. Qashyqtan jumys istegen tilshiler uıaly telefon arqyly mańyzdy málimetterdi óz baspanasynan onlaın habarlap otyrdy. Bul jańa úrdiske úırenisý alǵashynda ońaı bolmady. Operator, jaryq qoıýshy, rejısser syndy taǵy da basqa kóptegen mamandarsyz efırge shyǵý úlken jaýapkershilik pen eńbekti talap etti», deıdi Atameken Business arnasynyń telejúrgizýshisi Qaıyrbek Baı­myrza.

Áriptesimizdiń sózine sensek, atalǵan telearnanyń 90% qyzmetkeri úıden jumys istep, qalǵan qyzmetkerler redaksııa­da barlyq sanıtarlyq talaptardy oryndaı otyryp jumys istegen. Úıde telearnadaǵydaı teh­nıkalyq múmkindikter bol­­­­­masa da jańa jaǵdaıda efır­ ýa­qyty artyp, bastysy­ – jańa­lyqtar jelisinen ja­­ńyl­­maǵan. Ańdap qarasaq, koronavırýs kóp túsiniktiń to­nyn teris aınaldyrdy. Qo­ǵamǵa qalypty jaǵdaıǵa basqa qyrynan qaraýǵa, kóp nárseniń qadirin bilýge úıretti. Sabyrǵa shaqyrdy, sabamyzǵa keltirdi. Eldegi keıbir kemshin tustardy túzetýge jol ashty...

Qazirgideı qıyn sátte alǵy shepte qyzmet etken árbir maman ıesiniń eńbegi ólsheýsiz. «Jegeni jantaq, arqalaǵany altyn» áriptesterdiń jumysyn adal atqarý úshin eń qaterli aımaqtardan aqparat taratqan eren eńbegi elenip,  halyqtyń senimi arta tússe eken degen tilegi bar. О́kinishke qaraı, búginde koronavırýs ınfeksııasyn juqtyrǵandar sany 19 myńnan assa da indettiń ba­ryna senbeıtinder áli de bar. Qaıtkende de basty min­de­timiz aqparattandyrý, qu­laq­tandyrý bolǵandyqtan, qo­ǵamdy qaýipsizdik sharalaryn qatań saqtaýǵa shaqyrý jalǵasa beredi.

Qýanyshty jańalyqtar tara­tar kúnimiz kóp bolsyn!