Biz – eriktimiz!

Jalpy, medısına ma­mandyǵynyń ózi qaıyrym­dylyq, ıaǵnı bógde adamǵa kómek berýden bastaý alady ǵoı. Sondyqtan kolledj stýdentteri tájirıbelik sa­baq­tarda túrli ortaǵa baryp, el medısınasynyń damýyna qatysty málimetterdi jınaıdy. Iri saýda ortalyqtary men bazarlarda, halyq kóp jınalatyn oryndarda adam­dardyń qan qysymyn júıeli túrde ólshep turady. Bul is olardyń oqý baǵdarlamasyna kirmeıdi. Biraq bolashaq kásibine saı adamdarmen durys qarym-qatynas ornatý, halyqpen mádenıetti, saýatty sóılese bilý, jal­py kommýnıkatıvtik daǵ­dy­syn qalyptastyrý maqsa­tynda júrgiziledi. Emdeý mekemeleri men jedel-jár­­dem stansalarynda ót­­ki­ziletin tájirıbelik sa­baq­­tardan bólek, túrli áleý­­mettik mekemelerde de olar alǵan bilimin táji­­rıbe júzinde baıqap kóredi. Al patronajdyq kú­timge barý arqyly erikti retinde ýchaskelik medbıkege kómek kórsetedi. Munan basqa emdelýshilerdi elektrondy júıege tirkeý, olardyń aýrý tarıhyndaǵy málimetterdi kompıýterlik júıege engizý, emdelýshini qabyldaý kezindegi kásibı kómekter syndy jumystar emhanalarda jeterlik. Osy­nyń bárin medısınalyq kásipke mashyqtanyp júrgen eriktiler atqaratyny sózsiz.

Densaýlyq basqarmasy janynan jumys jasaıtyn kóptegen uıym, mysaly «Salamatty ómir saltyn qalyp­tastyrý» ortalyǵy, SPID, VICh aýrýlarymen kúres ortalyqtary, Qan ortalyǵy mamandary da kolledj eriktileriniń qyz­metine júginedi. Aıta­lyq, «Medbıkelik is» bólimi­niń «Meıirim» úıirmesi erik­tileri mektep oqýshylary men mektepke deıingi uıym­darda qol jýý tehnıkasyn úıretý sabaqtaryn júıeli túrde júrgizedi. Al «Aıaly alaqan» úıirmesi ýchas­ke­lik dárigerlerge qol­ǵa­bys etse, «Gıppokrat» úıir­­mesiniń músheleri múm­kindigi shekteýli balalardy tárbıeleıtin ortalyq qyz­metkerlerine jıi kómekke barady. Olar óz qolymen toqyǵan oıynshyqtaryn syılap, jalpy kútim boıynsha alǵan bilimin is júzinde qoldanady. «Akýsherlik is» bóliminiń eriktileri óz ma­mandyǵyna saı mektepter men kolledjderde, joǵary oqý oryndarynda «Qyz balalardyń jeke bas gıgıenasy», «Josparsyz júktilik saldary», «Otbasyn jos­parlaý», «Qyz taǵdyry – el taǵ­dyry» taqyryptarynda tanymdyq dárister men trenıngter ótkizýdi dástúrge aınaldyrǵan. «Farmasııa» bóliminiń eriktileri atalǵan maman­dyqty mektep oqýshy­laryna meı­lin­she nasıhattaýdy maqsat etse, «Gı­gıena jáne epıdemıo­logııa», «La­­bo­ratorııalyq dıagnos­tıka» bóli­miniń eriktileri tazalyq, jeke bas gı­gıenasy, salamatty ómir salty, zııan­dy ádet­terden aýlaq bolý syndy taqyryptarda aqparattyq dárister, beınerolıkterdi oqý oryndaryna tartaýmen aınalysady. «Emdeý isi» bóliminiń eriktileri jedel járdem stansalarynda, kanı­kýl kezinde aýyldyq feldsherlik ambýlatorııa­larda maýsymdyq vırýstyq dertterden saqtandyrý nemese aldyn alý jumystaryna belsendi aralasady.

2020 jyldyń Volonter jyly dep atalǵan sátinen bastap, kol­ledj­degi bel­sendi stýdentter toptas­qan Jastar komıteti músheleri erik­ti­likke talpynysy bar jastardan volon­ter tobyn jasaqtap, jo­ǵa­ry­da tizbektelgen is-shara­lar­ǵa qo­symsha birneshe jumys­ atqaryp úl­gerdi. El Prezıdenti Qasym-Jo­mart Toqaevtyń ózi belgilep ber­gen eriktiliktiń 7 baǵytyn negiz­ge alǵan Jastar komı­tetiniń «Ashyq júrek» erik­tileri «Bilim» baǵy­tyn­da kolledjdiń bitirýshi tú­lek­terine «Dıplommen – aýylǵa!» baǵ­darlamasy jó­ninde tolyq aqparat berý maqsatynda «Memlekettik baǵ­darlamalar jastarǵa qyz­met etedi» taqyrybymen Jastar resýrs­tyq orta­lyq­­­­tary mamandarymen, oblystyq ekonomı­ka jáne bıýdjetti jospar­laý bas­qarmasynyń mama­ny­men, Jas Otan jas­tar qa­naty ókil­­­deriniń qatysýy­men dóńgelek ústel uıym­das­tyrdy. «Úmit» ba­ǵytynda «Shapaǵat» medı­sınalyq-áleý­met­tik meke­me­sine «Kúl­­­ki terapııasy» baǵdar­la­ma­symen baryp, múgedek balalardyń kóńilin kóterip qaıtty. Qalalyq jastar resýrstyq ortalyǵynyń jas­tarymen birigip, qala­myz­dyń ardagerleriniń úıi­ne ár aptanyń beısenbi, juma kúnderi baryp, densaý­lyq­taryna baqylaý jasap turý «Qamqor» baǵytynda jolǵa qoıylǵan. «Asyl mura» baǵyty «Uly joldar óz tabaldyryǵyńnan bas­talady» uranymen kol­ledj kitaphanasynda kitap­tardy túpteý, jelimdeý ju­mystaryn atqaryp, áleý­mettik jeli arqyly kómek sura­ǵan Oral qalalyq zaǵıp jandarǵa arnalǵan arnaý­ly kitaphanasynda da sanı­tarlyq, tazalyq ju­mys­ta­­ryn júrgizdi. Sondaı-aq kol­ledj eriktileri ózde­ri qu­ralyptas jas­tarǵa al­ǵash­qy kómek kórsetýdiń oń­taı­­landyrylǵan ádisinen sheberlik­synyp uıymdastyryp otyrady.

Elde jarııalanǵan tó­ten­she jaǵ­­daıǵa baılanys­ty qashyqtan oqy­tý reji­minde bilim alýshylar ka­ran­tın kezinde de «Qol jýý algo­rıtm­deri» beınerolıgin túsirip, áleý­mettik jeli ar­qy­ly kópshilikke taratty. Indetpen kúres kezinde kol­­ledjimizdiń 19 stý­denti jedel jár­dem stansasy qyz­met­kerleri qa­ta­rynda teń dá­rejede el ıgiligine eń­bek etip júr. Bul – biz úshin úlken maq­tanysh.

Ásemgúl MIMARÝKQYZY,

Batys Qazaqstan Joǵary medısınalyq kolledji Jastar komıtetiniń ınspektory