Eldegi ekonomıkalyq ahýaldy esepke alǵan qor basshylyǵy qarajattyń birinshi bóligin Ulttyq qorǵa merziminen buryn aýdarýdy durys dep sheshti. Qarajattyń qalǵan bóligin «Samuryq-Qazyna» 2020 jyldyń sońyna deıin baǵyttaýdy josparlap otyr.
Buǵan deıin habarlanǵandaı, 2020 jyly 3 maýsymda «Samuryq-Qazyna» UÁQ» AQ Basqarý keńesiniń otyrysynda Ulttyq holdıngtiń 2020 jyldyń sońyna deıin Ulttyq qorǵa 100 mıllıard teńge baǵyttaýǵa daıyndyǵy týraly aıtyldy. Keńes tóraǵasy – Tuńǵysh Prezıdent Nursultan Nazarbaev bul bastamany qoldaıtynyn jetkizdi.
«Qor basshylyǵynyń der kezinde qabyldaǵan sheshimderin oń baǵalaımyn jáne qoldaımyn. Olar ózderiniń tıimdiligin kórsetti. Daǵdarys kezinde memleket ekonomıkany qoldaýǵa Ulttyq qordan qomaqty qarajat bóldi. Alaıda bul jaǵdaıda «Samuryq-Qazyna», kerisinshe, Ulttyq qorǵa 100 mıllıard teńge jiberedi», degen Elbasy daǵdarys kezindegi mundaı qadamnyń mańyzdylyǵyna nazar aýdardy.
Esterińizde bolsa, SPO sheńberinde «Samuryq-Qazyna» «Qazatomónerkásip» kompanııasy aksııasynyń 6,28 paıyzyn satylymǵa shyǵaryp, 206 mln AQSh dollary kóleminde qarajat tapqan bolatyn. Osylaısha atom kompanııasyndaǵy óz úlesin 75 paıyzǵa deıin qysqartty.
Kompanııanyń baspasóz qyzmeti jalpy 460 mln AQSh dollaryna ótinish kelgenin habarlady. Instıtýsıonaldyq ınvestorlardan kelgen ótinish josparlanǵan mejeden 2,2 ese kóp bolǵan. «Astana» halyqaralyq qarjy ortalyǵynyń bırja alańynda 69,7 mln AQSh dollaryna ótinish túsken. Ondaǵy qazaqstandyq ınvestorlardyń úlesi – 53,4 paıyz bolsa, qyzyǵýshylyq tanytqandardyń 46,6 paıyzy sheteldik ınvestorlar.
2008 jyly Qazaqstan Respýblıkasy Prezıdentiniń Jarlyǵymen qurylǵan kommersııalyq qurylym memlekettiń ulttyq ál-aýqatyn kóterý jáne ulttyq ekonomıkany jańǵyrtýǵa qoldaý kórsetý maqsatynda jumys istep keledi. Qor aktıvi shamamen 67 mlrd dollardy quraıdy. «Samuryq-Qazyna» AQ kompanııalar tobyna munaı-gaz jáne kólik-logıstıka sektorlarynyń, hımııa jáne atom ónerkásipteriniń, taý-ken keshenderiniń, energetıka, mashına qurastyrý jáne jyljymaıtyn múlik salalarynyń kásiporyndary kiredi.
