Áıgili basylym aıdaryndaǵy otyzynshy oryndy Garrı Potterdiń qyzyqty oqıǵalaryna qurylǵan romandar serııasyn jazǵan brıtandyq avtor Djoan Roýlıng alyp otyr. Onyń ótken jylǵy tabysy 92 mıllıon dollardy quraǵan. Bul tasyǵan baılyqtyń bári Garrı Potterdiń arqasy deýge sený qıyn. Degenmen, ol kitap 500 mıllıon danadan asyp jyǵylyp basylyp shyqqany esimizde. Tipti, tırajy jaǵynan Bıblııadan da ozdy. Biraq, Roýlıng sybaǵasynyń eń úlkeni – franshızalar men pesa qoıylymdarynyń tólemi bolyp shyqty.
Tabysty romanıstiń teatr sahnasynda qoıylǵan pesasy bir aptada 2,3 mıllıon dollar tabys ákelgen. Bul Brodveı tarıhyndaǵy rekordtyq kórsetkish. Al Garrı Potterdiń ǵajaıyp álemi týraly onynshy fılm – «Fantastıkalyq janýarlar: Grın-de-Valdtyń qylmysy» kúlli álem boıynsha 650 mıllıon dollar qarjy jınaǵan.
Forbes-tiń 28-shi orynynda eń kóp qalamaqy alatyn amerıkandyq avtor Djeıms Patterson 70 mıllıon dollar kirispen tur. Onyń kitaptarynyń 5,5 mıllıonnan asa danasy satylǵan.
Koroldik ádebı uıymnyń (Royal Society of Literature) zertteýlerine súıensek, Ulybrıtanııada 70 paıyzǵa jýyq kásibı jazýshylar 2018 jyly 10 myń fýnt sterlıng tabys tapqan.
Al irgemizdegi Reseıde joǵaryda atalǵan aýqymdy kórsetkishter qaıtalanbaıdy. Reseıde qazir bir kitap orta eseppen 4,5 myń tırajben jaryq kórip otyr. Tek tanymal detektıvshi Darıa Donsovanyń ǵana tırajy jalpy alǵanda 200 mıllıon danaǵa jetedi.
Jazýshylyqqa jańa qadam basqan avtordyń qalamaqysy 25 myń rýbldan aspaıdy. Al álemdik arenaǵa shyǵyp júrgen jazýshylarǵa mıllıon tólenýi de ábden múmkin. Máselen, jańaǵy Donsovanyń bir shyǵarmasynyń qalamaqysy 140 myń dollarǵa deıin jetedi. Detektıvtik romandarymen tanylǵan Aleksandra Marınınaǵa 100 ben 150 myń dollardyń arasynda tólenip júr. Budan bólek Borı Akýnın ortasha eseppen 30 myń dollar, al Tatıana Ýstınova 25 myń dollar kóleminde qalamaqy ala alady.
