Qazaqstanda 200-den astam jalǵan kásiporyndar qylmyskerler men nashaqorlardyń attaryna tirkelip kelgen eken. Ony respýblıka Qarjy polısııasy aqparattyq-taldaý departamentiniń basshysy Oljas Bektenov málimdedi.
Qazaqstanda 200-den astam jalǵan kásiporyndar qylmyskerler men nashaqorlardyń attaryna tirkelip kelgen eken. Ony respýblıka Qarjy polısııasy aqparattyq-taldaý departamentiniń basshysy Oljas Bektenov málimdedi.
«Matreshkı» qaǵıdatymen tereńdete tekserý jumystary buryn sotty bolǵan, nashaqorlyqpen aınalysyp júrgen, maskúnemdikke salynyp ketken, ólý halinde jatqan kisilerdiń attaryna tirkelgen 200-den astam jalǵan kásiporyndardyń bar ekenin anyqtap berdi. Sondaı-aq, bul toptardy uıymdastyryp, basqaryp júrgen adamdar da tabyldy», dedi ol.
Tutastaı alǵanda, O.Bektenovtiń sózine qaraǵanda, sıtýasııalyq ortalyq jumysynyń arqasynda jalǵan kásipkerlikpen aınalysýshy qylmystyq toptardy anyqtaý deńgeıi aıtarlyqtaı artqan.
«Eger búkil 2012 jyl boıyna respýblıka boıynsha jalǵan kásipkerlik deregimen 82 qylmystyq is qozǵalǵan bolsa, bıylǵy jyldyń 9 aıy ishinde ǵana anyqtalǵan mundaı qylmystar sany 771-ge jetti. Bylaısha aıtqanda, ótken jylǵa qaraǵanda, kórsetkish 3 esege jýyq kóterilip otyr», dep atap ótti departament jetekshisi.
«Budan bólek, sıtýasııalyq ortalyqtyń bazasynda jalǵan kásiporyndardyń, olardyń kontragentteri men tulǵalarynyń bazasy jasaldy. Bul salyqtan zańsyz jaltarý men qarjyny qolma-qol aqshaǵa aınaldyryp alýshylardy tez anyqtaýǵa múmkindik beredi», degendi qosty qarjy polısııasynyń ókili.
Aıta ketý kerek, Qarjy polısııasy agenttigi budan birqatar ýaqyt buryn sıtýasııalyq jaǵdaı ortalyǵynyń tusaýyn kesken bolatyn. Ol bolýy yqtımal kóleńkeli jáne jemqorlyq shemalaryn der kezinde anyqtap otyrýǵa múmkindik beretin avtomattandyrylǵan taldamaly keshen bolyp tabylady.
Qurysh NURYMBET.
