Dert deregi kóp shyqqan oblys ortalyǵy men Stepnogorsk qalasynda karantın shekteýleri barynsha kúsheıtiletin boldy. 24 maýsym kúni saǵat 00.00-den bastap Kókshetaý qalasy karantınge jabylsa, maýsymnyń 26-y kúni dál osyndaı qatań sharalar Stepnogorsk qalasynda júzege asyryldy. Barlyq kólik túrleri bul qalalardyń aýmaǵyna kirip-shyǵýǵa tyıym salyndy. Tek tranzıttik júk kólikteri men azyq-túlik tasymaldaıtyn kólikterge ǵana ruqsat etilip otyr. Tıisti organdar eki qala turǵyndaryna da saqtaný sharalary týraly túsinik jumystaryn júrgizýde.
– О́ńirimizde koronavırýs pandemııasymen kúres birshama tııanaqty júrgizilýde, – deıdi oblystyq taýarlar jáne kórsetiletin qyzmetterdiń sapasy men qaýipsizdigin baqylaý departamentiniń basshysy Aınagúl Mýsına, – halyqtyń densaýlyǵyn saqtaý úshin qajetti barlyq sharalar qolǵa alynýda.
Basqarma basshysynyń aıtýyna qaraǵanda, negizinen antıbakterıaldy terapııaǵa sefrıakson, seftazıdım, sefýroksım, lavofloksasın tárizdi preparattar qoldanylady eken. Búgingi tańda bul dárilerge medısına mekemeleri tarapynan suranys artyp otyr. Dári-dármektiń tapshylyǵynyń basty sebebi, baǵa aıyrmashylyǵynda tárizdi. Máselen, dárihanalarda qymbat preparattar jetkilikti mólsherde bolǵanymen, kópshilik jıi tutynatyn arzanqoldy dári-dármek sórelerde jatpaıtyn kórinedi. Osydan baryp el ishinde dárihanalarda dári joq degen qaýeset tarap ketken.
О́ńirdegi medısına mekemeleriniń dári-dármek qory ústemelep toltyrylmaq. Búgingi tańda «Arsha» medısınalyq kásiporny Kókshetaýdyń medısına mekemelerin dári-dármekpen qamtamasyz etip keledi. Bul kásiporyn úsh dárihanasy arqyly dári-dármek satýda. Basshylarynyń aıtýyna qaraǵanda, aspırın, parasetamol syndy ádette jıi qoldanylatyn dáriler jetkilikti.
Oryn tapshylyǵyn joıý úshin Esil men Jarqaıyń aýdandarynda, Atbasar qalasynda jańa oryndar jasaqtalýda. Oblys ákiminiń orynbasary Málǵajdar Tátkeevtiń aıtýynsha, Býrabaı aýdanynda eldi mekennen birshama alystaý ornalasqan jastar ǵımaraty bos tur. Endigi másele, ǵımarat ıesimen kelissóz júrgizý.
Oblys ortalyǵynda júk tasymaldaýdy syltaýratyp, zańsyz kirgen turǵyndar da anyqtalǵan. Bul máseleni sheshý úshin tártip saqshylary men medısına mamandary táýlik boıy karantın sharalaryn qatań baqylaıtyn bolady. Blok beketterde jumys isteıtin barlyq qyzmetkerlerge arnaıy talap qoıylǵan. Olar árbir eki saǵat saıyn beket aýmaǵyn zararsyzdandyryp otyrýy tıis. Barlyǵy arnaıy kıimdermen jáne qajetti qurylǵylarmen qamtamasyz etilgen.
Aqmola oblysy
