"Nursultan Nazarbaevqa ártúrli minezge ıe adamdarmen jarasym taba alady. Árıne, onyń harızmatıkalyq bolmysy týraly az aıtylmaıdy. Mundaı sırek qasıet árkimge berile bermeıdi, bul – rasynda da eń áýeli tabıǵat syıy, sodan keıin adamnyń ózin-ózi únemi damytýyna tikeleı baılanysty qasıet. Uzaq jyldar boıy Elbasynyń eńbegine shákirti retinde de, seriktesi retinde de, úzeńgilesi retinde de kóńil aýdara júrip, ár kez qabiletine tańǵalatynymdy jasyrmaımyn. Ol kóp oqıdy, ulttyq ádebıetke ǵana emes, shetel ádebıetine de kóńil bóledi, barlyq oqıǵadan habardar bolyp otyrady, eldiń tarıhy pen mádenıetin jetik biledi, ásirese ekonomıkalyq aqparatqa jiti den qoıady", dedi Memleket basshysy.
Prezıdent syrtqy saıasatta qyzmet etken adam retinde Nursultan Nazarbaevtyń sheteldik basshylarmen kezdesýge óte tyńǵylyqty ázirlenetininen habardar ekenin jetkizdi. Q.Toqaevtyń sózine súıensek, Elbasy N.Nazarbaev Syrtqy ister mınıstrligi men basqa da vedomstvolar daıyndaǵan aqparattyq materıaldarmen muqııat tanysyp, sodan soń jeke qoıyn dápterine óziniń tezısterin jazady.
"Ony barlyq nárse qyzyqtyrǵan deýge bolady: sol eldiń ekonomıkalyq jaǵdaıy, kezdesetin tulǵanyń minezindegi erekshelikter, iskerlik qasıetteri jáne basqalar. Osynyń bárin myqtap kóńilge túıetin tuńǵysh Prezıdent barlyq áriptesteri, tipti BAQ ókilderi úshin de tartymdy, qyzǵylyqty áńgimelesýshige aınalady. Eń erekshe qasıetiniń biri – ázil sózdi oryndy qoldanady. Elbasynyń taýyp aıtatyn ázil-qaljyńy ár kezdesý sońynan álemdik saıasat ókilderi arasyna birden tarap ketedi. Onyń tapqyrlyǵyn shetel saıasatkerleri únemi joǵary baǵalaıdy.
Bul qasıetteri ony udaıy jetistikke jetkizip keledi. Degenmen, saıası tulǵasynyń jóni bólek. Ol álemdik oqıǵalar týraly, ony óz eline ólshep-pishý arqyly zamanaýı qarym-qatynastaǵy qurylymǵa úılestirý týraly únemi oılanady. Iá, Elbasy Qazaqstannyń álemdik saıasattan shetkeri qalmaýy úshin de shetelderge kóbirek shyqqan, rezıdensııasynda sheteldik qonaqtardy jıi qabyldaǵan", dedi Q.Toqaev.
