Esirki qylmysyn jasady degen kúdikke Petropavl qalasynda turatyn 18 jastaǵy boıjetken ilikti. Polıseıler qala turǵynynan 40 gramǵa jýyq mefedron sıntetıkalyq esirtkisin aldy.
Áseri kúshti ári asa qaýipti dızaınerlik esirtkilerdiń biri Soltústik Qazaqstan oblysynda alǵash ret anyqtalyp otyr. – Sotqa deıingi tergep-tekserý sheńberinde jedel is-sharalar, onyń ishinde kúdiktiniń turǵylyqty jeri boıynsha tintý júrgizildi. Páterde esirtkige uqsas zat salynǵan túıinshek tabyldy.
Júrgizilgen sot-hımııalyq saraptama zattyń mefedron ekenin rastady, – dedi SQO Polısııa departamenti Esirtki qylmysyna qarsy is-qımyl basqarmasynyń bastyǵy Jandos Basybaev. Sondaı-aq, polıseıler býyp-túıetin materıaldar, noýtbýktar, tarazy jáne basqa da esirtki kásibin rastaıtyn zattardy anyqtady.
Sotqa deıingi tergeý materıaldarynan kúdiktiniń birneshe aı boıy ınternet-dúken arqyly esirtki satyp alyp, asa qaýipti zatty "jasyrý" baılanyssyz tásili arqyly saýdalaǵany belgili boldy. Qazirgi ýaqytta sotqa deıingi tergep-tekserý júrgizilýde, sot saraptamasy taǵaıyndaldy.
