Bilim basqarmasynyń basshysy Sholpan Qadyrova: "Oqý jylynyń sońyna pedagogıkalyq kadrǵa degen qajettilik 842 adamdy qurady. Negizinen bul – orys tilinde oqytatyn bastaýysh synyp muǵalimderi, orys tili men ádebıeti, matematıka, ınformatıka, aǵylshyn tili, defektologter, logopedter, sonymen qatar mektepke deıingi arnaýly bilimi bar tárbıeshiler qajet bolyp tur", deıdi onlaın-brıfıngte sóılegen sózinde.
Sondaı-aq basqarma basshysy bilim berý uıymdaryn kadrmen qamtamasyz etý boıynsha qalada jol kartasy bekitilgenin tilge tıek etti.
Onyń aıtýynsha, joba aıasynda respýblıkalyq JOO men tehnıkalyq jáne kásiptik bilim berý mekemelerimen jumys júrgizilip jatyr. Elordaǵa pedagogterdi tartý úshin ýnıversıtet túlekterimen onlaın kezdesýler júrgizý jumystary jalǵasyp jatyr. Mektepterdiń basshylary, balabaqsha meńgerýshileri onlaın eńbek jármeńkelerine qatysyp, enbek.kz portalynda úmitkerlerdi qarastyrylyp jatqanyn atap ótti.
"Bıyldan bastap jańalyǵymyz bar. Bilim basqarmasynyń saıtynda bos jumys oryndarynyń HR kadrlyq portaly ashyldy. Onda bilim berý uıymdaryna jumys isteýge yntaly kez kelgen adam bos jumys oryndaryna tirkelip, ótinish bere alady jáne basqa óńirlerden kelgen jas mamandarǵa 2019 jyly ashylǵan jataqhanaǵa joldama alýǵa bolady", deıdi basqarma basshysy Sh.Qadyrova.
Aldyńǵy aqparattarda aıtqanymyzdaı, bıyl bilim berý uıymdary jańa oqý jylyn qashyqtan bastaıdy. Sóıte tura bastaýysh synyp oqýshylary úshin arnaıy kezekshi synyptar ashylyp, onda 10-15 bala oqýdy qarastyryp otyr. Kezekshi synypqa barý úshin ata-analar arnaıy ótinish jazý kerek.
