Zulhıjja aıynyń alǵashqy on kúni qasıetti kúnder bolyp eseptelinedi. Sondyqtan osy kezde yntamen ǵıbadat etý, kóbirek izgi is isteý qajet. Arapa kúni oraza tutý – súnnet. Paıǵambarymyz (oǵan Allanyń salaýaty men sálemi bolsyn): "Arapa kúni oraza ustaý arqyly Alladan ótken jáne kelesi jyldyń kúnásin keshirýdi úmit etemin", – degen (Mýslım).
Qurban aıt kúnderinde baı adamǵa qurban shalý – ýájip. Qurban shalý Alla Taǵalaǵa jaqyn bolý úshin, kúnálar keshirilý úshin, Jaratýshy Iemizdiń kóptegen nyǵmetterine shúkir etý úshin, baı men kedeıge keńshilik jasaý úshin mindetteldi.
Alla Taǵala barshamyzǵa zulhıjja aıyn qulshylyqpen, saýapty istermen ótkizýdi jazǵaı, Qurban aıt meıramyn berekeli etkeı, jer betinde taraǵan indetten saqtap, elimizge amandyq, jurtymyzǵa tynyshtyq bergeı!
