Ultynyń azattyǵyn ańsaýmen ótken Ahmet Baıtursynuly «Muǵalim – mekteptiń júregi» degendi beker aıtpasa kerek. Jaqsy ustazdyń tárbıesin kórgen shákirttiń myqty maman ǵana emes, úlken adam bolary aqıqat. Ońtústikte osyndaı qasıetti kásipti qurmet tutyp, muǵalimdik mamandyqty tańdaǵan jastardyń boıyna bilim nárin seýip, ulttyq tárbıemen sýsyndatyp júrgen Ońtústik Qazaqstan memlekettik pedagogıkalyq ınstıtýty – ustazdardyń kıeli ordasy, tarıhy tereń qara shańyraǵy. Belgili ǵalym, ádisker-pedagog Ońalbaı Aıashev basqaratyn ınstıtýt jurtshylyqtyń jyly yqylasyna bólenip, jaqsy baǵasyn alyp keledi.
Ultynyń azattyǵyn ańsaýmen ótken Ahmet Baıtursynuly «Muǵalim – mekteptiń júregi» degendi beker aıtpasa kerek. Jaqsy ustazdyń tárbıesin kórgen shákirttiń myqty maman ǵana emes, úlken adam bolary aqıqat. Ońtústikte osyndaı qasıetti kásipti qurmet tutyp, muǵalimdik mamandyqty tańdaǵan jastardyń boıyna bilim nárin seýip, ulttyq tárbıemen sýsyndatyp júrgen Ońtústik Qazaqstan memlekettik pedagogıkalyq ınstıtýty – ustazdardyń kıeli ordasy, tarıhy tereń qara shańyraǵy. Belgili ǵalym, ádisker-pedagog Ońalbaı Aıashev basqaratyn ınstıtýt jurtshylyqtyń jyly yqylasyna bólenip, jaqsy baǵasyn alyp keledi.
Jaqynda bul bilim oshaǵynda Qazaqstan Respýblıkasynyń Prezıdenti, Elbasy Nursultan Nazarbaev atyndaǵy ǵylymı-ınnovasııalyq kabınettiń ashylýy men Elbasynyń «Kogda mysl – materıalna» atty kitabynyń tusaýkeser rásimi ótti.
Elbasy atyndaǵy ǵylymı-ınnovasııalyq kabınet joǵary tehnologııanyń eń sońǵy úlgisi boıynsha jabdyqtalǵan. Atap aıtqanda, Polıkom vıdeokonferens-baılanys apparatýrasy, 16 delegatqa arnalǵan dıskýssııalyq júıe, sońǵy úlgidegi 4 SMART teledıdarlarymen qamtamasyz etilgen. Bul kabınetke joǵary jyldamdyqpen lokaldy jáne WI-FI qosylǵan, álemdik ınternet resýrstaryna kirý múmkindigi qarastyrylǵan. Sonymen qatar, ǵylymı-zertteý jumystaryn júrgizýdi qamtamasyz etý úshin Tomson Reıters dúnıejúzilik derekter qoryna kirý múmkindigine ıe. Bul jerde ǵylymı jobamen aınalysatyn úzdik stýdentter men oqytýshy-professor quramynyń táýlik boıyna jumys isteýine tolyq jaǵdaı jasalǵan. Sondaı-aq, Elbasynyń 200-den asa kitaby, Nursultan Ábishuly týraly jazylǵan zertteý eńbekter jeke kitaphana retinde professor-oqytýshylar men stýdentter qaýymyna qyzmet kórsetetin bolady.
Osy is-sharaǵa arnaıy shaqyrylǵan fılologııa ǵylymdarynyń doktory, professor Myrzataı Joldasbekov, QR UǴA akademıgi, halyqaralyq «Qazaq tili» qoǵamynyń prezıdenti О́mirzaq Aıtbaıuly, fılologııa ǵylymdarynyń doktory, professor, R.Súleımenov atyndaǵy Shyǵystaný ınstıtýtynyń dırektory Ábsattar Derbisáli, sondaı-aq, halyqaralyq «Alash» syılyǵynyń ıegeri, jazýshy Marhabat Baıǵut, ınstıtýt professory, tarıhshy ǵalym Sábıt Joldasov mazmundy baıandamalar jasady.
«Biz tarıhymyzda basymyzdan nebir qıyndyqtardy keshken, surapyl soǵystardy, joıqyn jortýyldardy ótkergen, san ret qırap, san ret boı túzegen, tarıhtyń taǵdyrly kóshi deıtin uzaq jolda jaqsyny da, jamandy da kórgen, saltanatty ómir súrgen, handary altyn saraılarda da turǵan, altyn taqta da otyrǵan, irgeles eldermen beıbit ómir súre bilgen elmiz». Osylaı dep sózin bastaǵan Myrzataı Joldasbekovtiń baıandamasy tarıhı tolǵanys pen bereke-birlikke úndegen órlik rýhta jalǵasty. Alaýyzdyq pen ıtarazdyq kósegesin kógertpegen Qazaqtyń basynan baǵy ushqan qıly zamandarǵa toqtalǵan baıandamashy búgingi mamyra-jaı beıbit ómirge shúkirshilik jasaýǵa shaqyrdy. Tyńdarmandarǵa tóbe bıimiz Tóle bı men han Abylaıdy ah kúrsindirip, armanda ketkizgen táýelsizdikke Elbasymen birge jetken ár qazaq baqytty degendi jetkizdi.
О́mirzaq Aıtbaıuly kitapta jınaqtalyp berilgen dáristerdiń ózegin bilim, ǵylym, ınnovasııa, jahandaný, ıntegrasııa sekildi ózektiligin joımaıtyn dúnıeler quraıtyndyǵyna toqtalyp, árbirine jeke-jeke taldaý jasady. «Búgingi Qazaqstan – álemniń tórt tarabyna birdeı ashyq, jasampazdyqqa jany qushtar, aldyna órshil maqsattar qoıǵan, múmkindigi mol el. Jańa Qazaqstannyń qandaı bolmaǵy, qandaı mán men mazmunǵa ıe bolmaǵy búgingi jastardyń qolynda. Oı jetken jerge qol da jetetinin Elbasynyń kótergen bastamalary men qol jetkizgen jetistikteri kórsetip otyr», – dep oıyn qorytyndylaǵan til janashyry, akademık zalǵa jınalǵan stýdent jastardy otandy súıýge, qadirleýge úndedi.
Ábsattar Derbisáli Elbasynyń qazaq ǵylymy úshin jasaǵan qamqorlyqtaryna toqtaldy. «Mádenı mura» jáne «Tarıh tolqynyndaǵy halyq» baǵdarlamalaryna sáıkes shetelderden jınap ákelgen jaýhar dúnıelerimen jınalǵandardy tanystyrdy. Ál-Farabıdiń áıgili mýzyka týraly eńbeginiń jalǵyz danasyn ala kelgen baıandamashy qazirgi tańda taǵy da 29 Ál-Farabı tabylyp otyrǵanyn jáne bunyń baǵa jetpes mol qazyna ekenin jetkizdi. Túrkııaǵa barǵan saparynan ala qaıtqan rýhanı oljasyn zerttep, zerdeleý maqsatynda pedagogıkalyq ınstıtýt stýdentterin birlese jumys jasaýǵa shaqyrdy. Oqý ornynyń basshysy Ońalbaı Aıashevtiń bitirýshiler arasynan on stýdentti bilim granty negizinde Ábsattar Derbisáli basqaratyn Shyǵystaný ınstıtýtyna magıstratýraǵa jiberýge sheshim qabyldaǵan habaryn stýdent jastar zor qýanyshpen qabyldady.
Elbasy týraly «Sábı kúlkisi saqtalǵan kisi» atty beıneli baıandama jasaǵan Marhabat Baıǵut Memleket basshysynyń kisilik kelbetin kórkem kesteledi.
«Búgingi jasalǵan baıandamalardyń taqyryby túrlishe bolǵanymen, ózek bolǵan ıdeıa jalǵyz, ol – Elbasy eńbegi men qaıratkerligi. Elbasynyń ómir mektebi bizdi alǵa jeteleıdi, eńbekqorlyqqa, izdenimpazdyqqa baýlıdy. Biz Memleket basshysynan Otanǵa degen teńdesi joq otansúıgishtikti, jaýapkershilikti, bilimge qushtarlyqty, jetkinshekterge degen mahabbatty ózimizge úlgi etemiz jáne atalǵan qasıetterin joǵary qadirleımiz», dep ınstıtýt rektory Ońalbaı Aıashev jıyndy qorytty.
Oralhan DÁÝIT,
«Egemen Qazaqstan».
Ońtústik Qazaqstan oblysy.
Sýretterdi túsirgen Arman ÁBDIRAShULY.
