Qazaqstan Qorǵanys mınıstrligi aldaǵy eki jyldyń ishinde kásibı armııaǵa kóshý úderisin aıaqtaýdy josparlap otyr. Qazirgi ýaqytta Qazaqstan áskeri aralas prınsıp boıynsha jasaqtalýda. Qarýly Kúshterde merzimdi qyzmettiń jaýyngerleri de, kelisimshart boıynsha áskerı qyzmetshiler de qyzmet etedi.
Qazaqstan Qorǵanys mınıstrligi aldaǵy eki jyldyń ishinde kásibı armııaǵa kóshý úderisin aıaqtaýdy josparlap otyr. Qazirgi ýaqytta Qazaqstan áskeri aralas prınsıp boıynsha jasaqtalýda. Qarýly Kúshterde merzimdi qyzmettiń jaýyngerleri de, kelisimshart boıynsha áskerı qyzmetshiler de qyzmet etedi.Bul rette qatardaǵy jáne serjanttyq quramdaǵy áskerı qyzmetshilerdiń 65 paıyzy kelisimshart boıynsha qyzmet atqaratynyn atap ótken jón. Merzimdi qyzmettegi sarbazdardyń sanyn qysqartý shaqyrýshylar sanyn azaıtý esebinde júrgiziledi. Eger shaqyrylýshynyń joǵary bilimi bolsa, onda ol 6 aıdan soń kelisimshart boıynsha qyzmetin jalǵastyrýǵa quqyly, al qalǵandary bir jyldan soń kelisimshart boıynsha áskerı qyzmetin jalǵastyra alady.
– Qazir Qorǵanys mınıstrligi boıynsha 12 myńǵa jýyq merzimdi qyzmettiń sarbazdary qaldy. Biz osy kúzde 6 myń jaýyngerdi zapasqa shyǵaryp, 1,5 myń adamdy ásker qataryna shaqyramyz. 2014 jyldyń kókteminde taǵy 6 myń jaýynger zapasqa shyǵarylsa, 1,5 myń adam ásker qataryna shaqyrylatyn bolady. Ýaqyt óte kele osy myń jarym shaqyrylýshy 500 adamǵa deıin qysqarmaq. 2016 jyly armııamyzdy 99 paıyz kásibıler quraıtynyna senimdimin, – dep atap ótti Qorǵanys mınıstriniń birinshi orynbasary – QR QK Bas shtabynyń bastyǵy, general-polkovnık Sáken Jasuzaqov.
Qazaqstan Respýblıkasy Qarýly Kúshteriniń kelisimshart boıynsha áskerı qyzmetshileri laıyqty eńbekaqy men áleýmettik paketti ıelenip, tutastaı turǵyn úımen qamtamasyz etiledi. 10 jyldan kem qyzmet etken áskerı qyzmetshilerge turǵyn úıdi jalǵa alǵany úshin aqshalaı ótemaqy tólenetin bolady. Al alys garnızondaǵy áskerı qyzmetshiler úshin turǵyn úıler turǵyzylady. 2014 jyly 500 úı salynady. Qorǵanys mınıstrligi 2017 jylǵa deıin barlyq áskerı qyzmetshilerdi turǵyn úımen qamtamasyz etýdi josparlap otyr.
Sonymen qatar, Qorǵanys mınıstrligi áskerı qyzmetshilerge laıyqty bilim alý múmkindigin de usynyp otyr. 2014 jyly 1 qyrkúıekte Ulttyq qorǵanys ýnıversıteti Shýchınskiden Astana qalasyna kóshiriledi. Bolashaqta serjanttardyń akademııasyn nemese ınstıtýtyn qurý josparlanǵan. Ofıserler men serjanttar 8 jyl áskerı qyzmet etken soń Qorǵanys mınıstrliginiń esebinen shet memleketterdiń oqý oryndarynda bilim ala alady.
– Memleket basshysy – Joǵarǵy Bas qolbasshy N.Á. Nazarbaevtyń talaby boıynsha Qazaqstannyń Qarýly Kúshteri sany az, daıyndalǵan, kásibı jáne qazirgi zamanǵy áskerı tehnıkalarmen jabdyqtalýy tıis. Bul ýaqyt talaby, óıtkeni, qazir áskerı is-qımyldardy júrgizý óneri ózgerdi. Búginde operasııalardyń tabysyn jańa qarý-jaraqtar, tehnologııalar men tehnıkalar sheshedi. Osy qarý-jaraqtardy ıgerip, olardy qoldaný úshin bizge jan-jaqty daıyndyqtan ótken joǵary synypty mamandar qajet, – dep atap ótti QR QK Bas shtabynyń bastyǵy.
Budan buryn habarlaǵanymyzdaı, bıylǵy alǵashqy úgit-nasıhat naýqany sheńberinde 7 myń adam kelisimshart negizinde qyzmet etýge nıet bildirdi. Qorǵanys mınıstrligi kelisimshart boıynsha kezekti irikteý sharalaryn 2014 jyldyń basynda júrgizedi.
«Egemen-aqparat».
