Ekologııa • 24 Shilde, 2020

Almaty ózenin sabyn kóbigi basty

645 ret kórsetildi

Almatydaǵy ózen arnasynan kir jýylǵan sabyn kóbiginiń aǵyp jatqanyna baılanysty túsirilgen áýesqoı vıdeo áleýmettik jelide qyzý talqyǵa tústi, dep habarlaıdy Egemen.kz

Ekologter derek kóziniń qaıdan shyqqanyn anyqtap jatyr. Alaıda ózen sýynyń qalaı lastanyp ketkenin anyqtaý qıyndyq týdyryp otyrǵanyn jasyrmaıdy.

Jeli qoldanýshysy: "Bizde halyq ne isteıdi, qarańyzdar. Kóbik, munda kir jýǵysh untaqtyń ıisi bar. Ne degen sumdyq", deıdi beınerolık avtory. Sondaı-aq pikir bildirýshiler sońǵy ýaqytta elimizde mundaı faktiler jıilep ketkenin atap ótti.

– Bul qandaı da bir chellendje be? Adamdar sizderge ne bolǵan? Tabıǵatty aıalańyzdar! – deıdi pikir bildirýshiler. Al keıbiri bul vıdeonyń kórshiles Reseı memleketiniń aýmaǵynda túsirilgen dep topshalaıdy.

Ekologııa mınıstrligine qarasty Ekologııalyq retteý jáne baqylaý komıtetiniń tóraǵasy Zýlfýhar Joldasov jelide vıdeo paıda bolǵan soń, dereý oqıǵa ornyna mamandardyń kelgenin aıtty.

"23 shilde kúni áleýmettik jelilerde Almaty qalasy Naýryzbaı aýdany, Qarǵaly ózeniniń jappaı kóbiktenýge baılanysty vıdeo paıda bolǵandyqtan, Ekologııa departamentiniń qyzmetkerleri dereý oqıǵa ornyna shyqty. Kelgen sátte sý taza boldy. Taý sýynyń synamalaryn iriktep aldy. Halyq arasynda saýaldama júrgizile bastady. Turǵyndardyń aıtýynsha, ekologter kelgenge deıin birneshe saǵat buryn ózende osyndaı kórinis bolǵan", deıdi Zýlfýhar Joldasov.

Zýlfýhar Joldasovtyń aıtýynsha, ekologııa departamentiniń ınspektorlary joǵarydan tómenge qaraı zertteý júrgizýde. Osy alqapta turǵyn alaptary bar ekenin jáne qala aımaǵyna jaqyn ornalasqandyqtan, tyǵyz qurylys jumystary júrgizilip jatqanyn da atap ketti. Atalǵan oqıǵaǵa jaýapty retinde polısııa ókilderin jáne ýchaskelik qyzmetkerlerdi qosatynyn naqtylady.

Sońǵy jańalyqtar

Taǵy 868 qazaqstandyq indet juqtyrǵan

Koronavırýs • Búgin, 09:30

Búgin birqatar óńirde úsik júredi

Aýa raıy • Búgin, 09:06

Uqsas jańalyqtar