Qazaqstan boksshylary birinshilikti jeńispen bastady

Keshe Almatyda ótip jatqan bokstan XVII álem chempıonatynyń besinshi kúni aıaqtaldy. Osy kúni boksshylar ekinshi aınalymdy bastap ketti. Ol 52, 64 jáne 91 kıloǵa deıingi salmaqtaǵylar arasynda ótti.

Jankúıer qaýym 2011 jylǵy álem chempıonatynyń kúmis júldegeri, Eýropanyń 2013 jylǵy chempıony ýelstik Endrıý Selbı men Qurama Shtattar ókili Malık Djekson judyryq siltesken shaıqasty birinshi bolyp tamashalady. Bul bir asa tartysty ótken urys boldy. Sondyqtan aqyrǵy sátine deıin kimniń baǵy janatyny belgisiz bolyp turdy. Al tóreshilerdiń baǵamy boıynsha, brıtanııalyq jigittiń urǵan soqqylary dálirek tıgen bolyp shyqty. Budan keıin osyndaı keskilesken urysta kýbalyq Geraldo Tejerıa japon Sadaıorı Aokıdi tize búktirdi. Endi úshinshi aınalymda osy juptardyń jeńimpazdary júzdesedi.

Keshe Almatyda ótip jatqan bokstan XVII álem chempıonatynyń besinshi kúni aıaqtaldy. Osy kúni boksshylar ekinshi aınalymdy bastap ketti. Ol 52, 64 jáne 91 kıloǵa deıingi salmaqtaǵylar arasynda ótti.

Jankúıer qaýym 2011 jylǵy álem chempıonatynyń kúmis júldegeri, Eýropanyń 2013 jylǵy chempıony ýelstik Endrıý Selbı men Qurama Shtattar ókili Malık Djekson judyryq siltesken shaıqasty birinshi bolyp tamashalady. Bul bir asa tartysty ótken urys boldy. Sondyqtan aqyrǵy sátine deıin kimniń baǵy janatyny belgisiz bolyp turdy. Al tóreshilerdiń baǵamy boıynsha, brıtanııalyq jigittiń urǵan soqqylary dálirek tıgen bolyp shyqty. Budan keıin osyndaı keskilesken urysta kýbalyq Geraldo Tejerıa japon Sadaıorı Aokıdi tize búktirdi. Endi úshinshi aınalymda osy juptardyń jeńimpazdary júzdesedi.

Kelesi kezekte bokssúıer qaýym bıyl ǵana Iordanııada Azııa chempıony bolǵan qyrǵyz Azat Úsenalıev pen moldovan Alek­sandr Ryshkannyń jekpe-jegin jiti qadaǵalady. Sebebi, bul jupta ıyǵy ozǵan oǵlan aldaǵy aıqasta bizdiń Ilııas Súleımenovtiń qarsylasy bolyp qalýy yqtımal edi. Ony aqyryn Alatoo baýraıynan kelgen baǵlan óz paıdasyna sheshe bildi. Budan keıin kezek Ilııasqa keldi. Al oǵan óziniń ekinshi elekke ótýge laıyqty ekenin dáleldeý úshin kóp ter tógýge týra keldi. Avstralııalyq Endrıý Melonı urys bastalǵannan ólispeı berispeıtinin baıqatty. Buǵan Ilııas ádemi qorǵanys pen der kezinde jasalǵan qaýyrt shabýylmen jaýap qaıtaryp otyrdy. Ol ózinen týra 20 kún kishi áriptesin ekinshi raýndtan yrqynda ustaı bastady. Nátıjesinde Qazaqstan jasaǵy týrnırdegi birinshi jeńisine qol jetkizdi. Elimiz quramasynyń bas jattyqtyrýshysy Myrzaǵalı Aıtjanov osyǵan oraı: «Bizdiń alǵashqy shaıqastarymyz Ilııas pen Mereıge úlken jaýapkershilik júktedi. Olar Qazaqstan boks mektebiniń deńgeıin kórsetýge tıis boldy. Ázirge sol deńgeıden tabylǵan Ilııasty 22 qazan kúni qurlyqtyń bıylǵy chempıony Azat Úsenalıev syndy óte kúshti qarsylas kútip tur», – dedi.

Irlandııa quramasynyń arda­geri Peddı Barns pen serb Mı­losh Baltıchtiń arasyndaǵy jek­pe-jekke de toqtala ketýge bolady. Munda jasy da úlken, ataǵy da kóp brıtanııalyq boksshy alym­dy kórindi. Osynyń sońyn ala anglııalyq Charlı Edvards kenııalyq Sımon Nzıokıden tehnıkalyq nokaýtpen jeńilip qaldy. Buǵan onyń birinshi raýndta qabaǵyn jaryp alǵany da áser etken sııaqty. Budan ári armıan Narek Abgargıan Makedonııanyń jarystaǵy jalǵyz ókili Mýmın Velıdi yǵystyryp, ilgerige qadam jazdy. О́zbekstandyq uıǵyr jigiti Jasýrbek Latıpov germanııalyq arab Hamza Toýbany tómpeshtep tastady.

Kórermen kópshilik 64 kıloǵa deıingiler urystaryn da asyǵa kútti. Sol ynta men yqylasqa saı osy salmaqtaǵy Mereı Aqshalov óziniń jekpe-jegin óte jaqsy ótkizdi. Gong soǵylǵan boıda atoılap alǵa umtylǵan bizdiń jigit rıngtiń shyn mánindegi ıesi sekildi erkin qımyldady. Degenmen, qar­sylasy da qarap qalmady. Ádette qorǵanysqa myǵym Mereıdiń shabýylǵa shyqqan kezinde ashylyp qalǵan sátterin utymdy paı­dalanǵan ol ara-tura dál soqqylar berip turdy. Soǵan qaramastan, bizdiń sańlaqtyń artyq ekenine eshkim kúmán keltirgen joq. Al qu­rama bas jattyqtyrýshysy bul urysqa: «Mereı bizdiń bergen nus­qaýymyzdy dál oryndap, óte jaqsy shaıqasty. Endi Ilııas pen Mereıdiń jeńisteri komandadaǵy basqa jigitterdiń eńselerin kóterip, jigerlerin janıtyn shyǵar degen oıdamyn», – degen baǵa berdi. Al Mereıge kelesi aınalymda do­mı­nıkandyq Karlos Adams básekeles bolady. Ol osy joly AQSh boks­shysy Hose Aldeıdi ádemi etip utyp berdi. Bular endi 21 qazan kúni bir-birimen betpe-bet keledi.

Almaty rıngine ótken jolǵy jahandyq jarysta top jarǵan­dardyń beseýi birdeı kelip otyr. Ádette myqtylardyń shoǵyry dál mundaı deńgeıde qaıta jınala bermeıdi. Al osynyń aldynda ǵana kásipqoı boksqa aýysyp, nápaqalaryn sol jaqtan tabýǵa bekingen qytaı Zoý Shımın, ýkraındar Vasılıı Lomachenko, Taras Shelestıýk, Aleksandr Ýsık kele qalǵanda, chempıondar túgeldenip qalǵandaı eken. Tek Bakýde juldy­zy janǵan ýkraın Evgenıı Hıtrov qana óz eliniń quramasy sapyna ilinbeı qalypty. Osylaı birneshe myqtysynan aıyrylyp qalǵanynan da shyǵar, Ázerbaıjan astanasynda komandalyq esepte birinshi oryn alǵan Ýkraına quramasy bul birinshilikte aıryqsha kózge túse almaı tur. Sol sııaqty AQSh quramasy da qazirdiń ózinde 7 boksshysynan aıyrylyp qaldy.

Endi birinshilikke júginip jetken 2011-diń chempıondaryna oıyssaq, tildiń ushyna bul lekte kýbalyqtar Lazaro Alveres pen Hýlıo de la Krýs, reseılik Mısha Aloıan, ázer­baıjandyq Magomedrasýl Med­jıdov jáne brazılııalyq Everton Lopes bar ekeni keler edi. Mine, osylardyń sońǵysy keshe chempıondar arasynan birinshi bolyp urysqa aralasyp, mavrıkıılik Lıýs Kolındi erkin utyp shyqty. Túbinde bizdiń Mereıdiń básekelesi bolyp qalýlary yqtımaldar qa­taryndaǵy qyrǵyz Ermek Sakenov ırlandııalyq talantty boks­shy Raımond Moıletten basym tústi. Sol sııaqty Almaty jan­kúıer­leriniń kóńilinen shyǵa bastaǵan tájik Shavkatdjon Rahımov táji­rıbeli serb Branımır Stankovıchti keskilesken urys ústinde utty.

91 kıloǵa deıingi salmaqtaǵylar arasynda bizge horvat Marko Galıchtiń qytaı Ksýanksýan Vangti, ázerbaıjan Teımýr Mamedovtiń nıgerııalyq Etebor Apochıdi ut­qandary unady. Osy toptaǵy eń ataǵy zorlardyń biri – ıtalıan Klemente Rýsso grýzın Levan Gý­ledanıden aıqyn basym boldy. Ataǵynan at úrketin taǵy bir tarlan, kýbalyq Erıslandı Savon koreı Jın-Ho Heony birinshi raýndta-aq nokaýtqa jiberip, óziniń áli babynda ekenin tanytty.

Jasyratyny joq, óz «sáı­gú­likterimiz» bir kezeńniń kermesinen aǵyp óte shyqqannan keıin kóńil­derimizdi demdegen biz keshki sessııany asyǵa kúttik. Buǵan sol aralyqta 91 kılodaǵylar arasynda Anton Pınchýktiń shaıqasqa qosylatyny sebep bolyp edi. Onyń vengr Imre Shellomen jekpe-jegi sessııanyń sońǵy jaǵynda ótti. Al oǵan deıin biz reseılik Evgenıı Tıshenkonyń belorýs Sergeı Korneevti, bra­zı­lııalyq Hýan Nogýeıranyń ame­rıkalyq Maıkl Hıltondy, ózbek Rýstam Týlıaganovtyń moldovan Vladımır Chelesti qalaı utqanyn tamashaladyq.

Bir kezde Anton Pınchýk te shyq­ty alańǵa. Onyń qarsylasy Imre Shellonyń boıy edáýir bıik eken. Qoly da uzyn kórindi. Osyǵan qarap, azdap qobaljyǵanymyz ras. Biraq sol kúmándi bizdiń batyr baǵlan kóp uzamaı seıilte bastady. Bizdińshe, ol úsh raýndta basym boldy. Muny tóreshiler de ádil baǵalady. Sóıtip, keshe sharshy alańǵa shyqqan úsh sańlaǵymyz da jeńis toıyn toılap, myńdaǵan jankúıerlerin qýantty. Al An­ton­nyń 21 qazan kúni júzdesetin kelesi qarsylasy ózbek Rýstam Tý­lıaganov bolǵaly tur. Osylardyń bárin saralap shyqqan M.Aıtjanov sońynda: «Antonǵa bul shaıqas ońaıǵa túsken joq. Biraq Pınchýk óziniń kúshti ekenin tanytty. Men onyń endi qosa túsetinine senemin», – degendi aıtty.

Búgin 49, 56 jáne 75 kıloǵa deıingi salmaqtardaǵy boksshylar rıngke shyǵady. Munda Bir­jan Jaqypov – reseılik Belık Ga­lanovpen, Qaırat Erálıev – rýmyn Nıkolae Andreanamen, Jánibek Álimhanuly ázerbaıjandyq Sol­tan Mıgıtınovpen qolǵap túıis­tiredi. Al erteń Berik Ábdirah­manov – pýer­torıkolyq Danıelıto de la Ro­samen, Danııar Eleýsinov – ba­gamdyq Karl Hıeldpen, Ádil­­bek Nııazymbetov fın Vıl­le Hýk­kenenmen aıqasady. Qa­zannyń 22-sinde Ivan Dychko rıngke kóte­riledi. Jarysty birden 1/8 fınaldan bastaıtyn onyń qarsylasy ázir­ge belgisiz.

«Egemen Qazaqstannyń»

álem chempıonatyndaǵy kóshpeli redaksııasy.

Sýretterdi túsirgen Bersinbek SÁRSENOV.

Sýretterde: 1. rıngte – I.Súleımenov; 2. jerlesimiz A.Pınchýk shabýylda;

3. M.Aqshalovtyń jeńisi.