Is-sharaǵa IYU-na múshe elderdiń ókilderi, sondaı-aq Islam saýda, ónerkásip jáne aýylsharýashylyq palatasynyń (ICCIA) bas hatshysy Iýsef Halavı jáne Azyq-túlik qaýipsizdigi jónindegi Islam uıymynyń (IOFS) bas dırektory Erlan Baıdaýlet qatysty.
Aıta ketý kerek, Iýsef Halavı myrza - iri halyqaralyq ınvestısııalar jónindegi maman, birqatar halyqaralyq kompanııalardyń dırektorlar keńesiniń múshesi. Azyq-túlik qaýipsizdigi jónindegi Islam uıymy Hatshylyǵynyń shaqyrýymen 2020 jyly shildede AQIU men ICCIA arasyndaǵy yntymaqtastyqty nyǵaıtý jáne Ortalyq Azııadaǵy halal standartyn damytý maqsatynda Qazaqstanǵa saparmen kelý kerek bolatyn. Alaıda, pandemııaǵa baılanysty bul sapar keıinge shegerildi.
Onlaın-konferensııa barysynda ınvestısııalar men ıslamdyq qarjylandyrý, saýda-sattyq tóńiregindegi, aqparattyq tehnologııalar, saqtandyrý salasyndaǵy yntymaqtastyqty nyǵaıtý, IYU-ǵa múshe elderdiń jeke sektorynda baılanys ornatý týraly aqparat pen pikirler ortaǵa salyndy.
Saparhan Omarov azyq-túlik qaýipsizdigi máselelerinde halyqaralyq uıymdar róliniń mańyzdylyǵyna toqtaldy.
"Islam konferensııasy uıymyna múshe elderdiń aýyl sharýashylyǵy mınıstrleri azyq-túlik ónimderin qaıta óńdeýdiń ıslam qaýymdastyǵyn (IFPA) qurýǵa sheshim qabyldady. Bul bizdiń sapa standarttary salasyndaǵy yntymaqtastyǵymyzdy jáne azyq-túlik ónimderin óndirý men satýdy ulǵaıtý úshin berik negiz bolady dep senemin. Qaýymdastyqtyń maqsaty - saýdany keńeıtý, ıslamdyq qarjylandyrýdy tartý, aqparat almasý, baılanys ornatý, uıymǵa múshe elder arasynda eksport pen ımportty arttyrý", - dedi Aýyl sharýashylyǵy mınıstri.
Saparhan Omarov koronavırýs pandemııasy azyq-túlik qaýipsizdigi máseleleri, sondaı-aq halyqty ýaqtyly jáne turaqty azyq-túlikpen qamtamasyz etýdiń mańyzdylyǵyn aıqyndap bergenin atap ótti.
