WTA reıtınginiń jańartylyp jatqan derekterine sáıkes, qazaqstandyq sportshy upaı sany boıynsha Polsha tennısshisi Iga Shvıontekti basyp ozdy. Polsha ókili Indıan-Ýells týrnıriniń shırek fınalynda jarys jolynan shyǵyp qalǵan.
Jartylaı fınalda Rybakına fınal joldamasy úshin ýkraınalyq tennısshi Elına Svıtolınamen kezdesedi. Eger bul matchta jeńiske jetse, otandasymyz WTA reıtıngindegi Shvıontekten upaı aıyrmasyn odan ári ulǵaıtýy múmkin.
Aıta keteıik, shırek fınaldyq kezdesýde Elena Rybakına amerıkalyq tennısshi Djessıka Pegýlany eki sette – 6:1, 7:6 (7:4) esebimen jeńdi.
Qazaqstan tennıs federasııasynyń habarlaýynsha, bıylǵy maýsymdaǵy Elena Rybakınanyń basty maqsaty – álemniń birinshi raketkasy ataǵy úshin kúresý. Osy strategııalyq maqsatqa basymdyq berilgendikten, tennısshi aldaǵy Billie Jean King Cup týrnıriniń irikteý kezeńine Qazaqstan áıelder quramasynyń resmı tizimine engizilmegen.
Federasııa ókilderiniń aıtýynsha, tennısshiniń WTA reıtınginde kósh bastaý múmkindigi el sporty úshin tarıhı jetistik bolmaq. Sondyqtan barlyq kúsh osy maqsatqa jetýge baǵyttalyp otyr.
Aıta keteıik, qazir álemniń birinshi raketkasy mártebesin reıtıngtik upaı boıynsha aıqyn basymdyqpen Belarýs tennısshisi Arına Sobolenko saqtap tur.
Indıan-Ýells týrnıri Qazaqstannyń taǵy bir ókili úshin de sátti ótip jatyr. Juptyq synda otandasymyz Anna Danılına serbııalyq tennısshi Aleksandra Krýnıchpen birge bedeldi týrnırdiń fınalyna joldama aldy.
