Foto: pixabay.com
Qujatta «eger mámile ıpotekalyq turǵyn úı qaryzy esebinen jyljymaıtyn múlik satyp alý maqsatynda jasalsa – tarıf 4 AEK bolady» dep naqty kórsetilgen.
Bul túzetý Ádilet mınıstriniń 2025 jylǵy 27 qyrkúıektegi №533 buıryǵyna engizildi. Qujat 2026 jylǵy 26 aqpanda Ádilet mınıstrliginde resmı tirkeldi.
Jańa tártipke sáıkes, ıpoteka arqyly turǵyn úı satyp alatyndar úshin notarıýsta mámile rásimdeý aqysy standartty tarıfpen salystyrǵanda úsh ese arzan bolady.
2026 jyly 1 AEK – 4325 teńge. Soǵan sáıkes ıpoteka arqyly satyp alý-satý shartyn rásimdeý quny:
- 4 AEK – 17 300 teńge;
- buryn qoldanylǵan standartty tarıf – 12 AEK nemese 51 900 teńge.
Osylaısha, notarıýstar endi ıpotekamen úı satyp alýshylardan 4 AEK-ten artyq aqy alýǵa quqyly emes.
Negizinde ıpotekalyq mámilelerge arnalǵan 4 AEK mólsherindegi jeńildik buryn da bolǵan. Alaıda 2026 jylǵy 1 qańtardan bastap kúshine engen Ádilet mınıstrliginiń jańa buıryǵynda bul norma naqty kórsetilmegen.
Qujatta tarıf tek ıpotekalyq qaryz shartyna qatysty jazylyp, ıpoteka arqyly jasalatyn satyp alý-satý kelisimi týraly naqty aıtylmaǵan. Osy sebepti birqatar notarıýs standartty 12 AEK tarıfin qoldana bastaǵan.
Keıin BAQ saýaldarynan soń Ádilet mınıstrligi qujatqa naqtylaý engizip, jeńildetilgen tarıfti resmı túrde bekitti.
Jeńildetilgen ıpotekalarǵa ótinim qabyldaý qashan bastalady?
Ipotekadan basqa jaǵdaılarda tarıfter ózgerissiz qaldy.
Eger satýshy men satyp alýshy jeke tulǵalar jáne týys emes bolsa:
− 12 AEK – 51 900 teńge.
Eger taraptar jaqyn týystar bolsa (ata-ana, bala, jubaılar, nemere, týǵan baýyrlar):
− 7 AEK – 30 275 teńge.
Eger taraptardyń biri zańdy tulǵa bolsa:
− 17 AEK – 73 525 teńge.
Al mámilege jubaıynyń notarıaldyq kelisimi qajet bolsa:
− 1,5 AEK – 6487 teńge.
Aýyldyq jerdegi jyljymaıtyn múlikke qatysty mámilelerde tarıf tómenirek belgilengen:
− taraptar týys bolsa – 1,5 AEK (6487 teńge);
− týys emes bolsa – 2,7 AEK (11 678 teńge);
− taraptardyń biri zańdy tulǵa bolsa – 3 AEK (12 975 teńge).
Bul tarıfterdi mámileni qaladaǵy notarıýs rásimdese de qoldanýǵa bolady.
Notarıýsta shartqa qol qoıý birden menshik quqyǵy berildi degendi bildirmeıdi. Satyp alýshy mámile memlekettik tirkeýden ótkennen keıin ǵana úıdiń tolyqqandy ıesi bolady.
Tirkeý qujattaryn notarıýs ózi joldaıdy. Al satyp alýshy memlekettik baj salyǵyn tóleıdi:
− 1304 teńge (QQS-syz) – páter nemese jeke úı satyp alǵanda.
Mámileni tirkeýdiń eki nusqasy bar:
− standartty tirkeý – 3 jumys kúni;
− jedel tirkeý – shamamen 2 saǵat (quny 5000 teńge).
eGov portalyndaǵy jeke kabınette menshik quqyǵy tirkelgeni týraly habarlama paıda bolǵannan keıin mámile tolyq aıaqtalǵan bolyp sanalady.
