Jospar boıynsha Kókaral bógeti qaıta jańǵyrtylyp, Soltústik Aral teńizindegi sý deńgeıi Baltyq júıesi boıynsha 44 metrge deıin kóteriledi. Sonyń nátıjesinde sý aıdynynyń aýmaǵyn 3 913 sharshy shaqyrymǵa deıin, al sý kólemin 34 mlrd tekshe metrge deıin ulǵaıtý josparlanǵan.
Joba aıasynda Túrkistan jáne Qyzylorda oblystaryndaǵy Aral-Syrdarııa basseıniniń ırrıgasııa júıelerin jańǵyrtý men avtomattandyrý jumystary da júrgiziledi. Mınıstrlik osy baǵytta 160-tan astam jobalaý-smetalyq qujat ázirlep jatyr. Bul sharalar sýdy tıimdi paıdalanýǵa múmkindik berip, únemdelgen sý kólemin Soltústik Aral teńizine baǵyttaýǵa jaǵdaı jasaıdy.
Qazirgi ýaqytta joba Premer-mınıstrdiń tóraǵalyǵymen jumys isteıtin Halyqaralyq qarjy uıymdarymen jumys jónindegi úılestirý keńesiniń qaraýyna usynylyp otyr. Jobany iske asyrý merzimi 2026-2029 jyldarǵa josparlanǵan.
Sońǵy jyldary Soltústik Aral teńizindegi jaǵdaı birshama jaqsara bastaǵan. Syrdarııa ózenindegi sý qoımalarynyń jumys rejımin kelisý jáne memleketaralyq kelisimderdi saqtaý nátıjesinde sońǵy úsh jylda teńizge 6 mlrd tekshe metrden astam sý keldi. Sonyń arqasynda teńizdegi sý kólemi 2022 jyldyń sońyndaǵy 18,9 mlrd tekshe metrden 2025 jyldyń sońyna qaraı 23 mlrd tekshe metrge deıin artty.
Sý resýrstary jáne ırrıgasııa mınıstri Nurjan Nurjigitov bul máseleniń mańyzyna toqtalyp ótti.
«Memleket basshysy Soltústik Aral teńizin saqtaý máselesiniń mańyzyn birneshe ret atap ótti. Byltyr Qazaqstan men О́zbekstan úkimetteri arasynda transshekaralyq sý nysandaryn birlesip basqarý jáne utymdy paıdalaný týraly kelisimge qol qoıyldy. Ortalyq Azııa elderi úshin Soltústik Araldy saqtaý jáne qalpyna keltirý – tek ekologııalyq másele ǵana emes, sonymen qatar áleýmettik ári strategııalyq mindet», dedi mınıstr.
