B.Saǵyntaev kún saıyn fýnksıonaldy gospıtaldegi jóndeý jáne árleý, josparlaý jumystarynyń qalaı júrip jatqanyn tekserip otyrady. Munda naýqastar palatalary, jansaqtaý bólimi, PTR testileýden ótkizetin zerthana ári medısınalyq qyzmetkerlerdi daıarlaıtyn jáne qaıta daıarlaıtyn ortalyq bolady. Iаǵnı, zamanaýı medısınalyq quraldarmen jabdyqtalǵan jeke medısınalyq mekeme qurylady.
Eske salsaq, búgingi kúni Almatyda COVID-19-ben kúreske 27 medısınalyq uıym jumyldyrylǵan. Tósek-oryn qorynyń jalpy sany alty myń orynnan asady. Al, tósek-orynnyń paıdalanylýy 90-nan 50 paıyzǵa deıin tómendegen.
Qazirgi kezde kúzgi-qysqy maýsymda bolýy múmkin pandemııanyń jańa tolqynyna daıyndyq barynsha qarqyndy júrýde. Sondyqtan birinshi eshelondaǵy ınfeksııalyq stasıonarlarda tósek-oryn (aýyr jaǵdaıdaǵy naýqastar úshin) sany taǵy 1015 orynǵa artady.
