Sýretti túsirgen Rafhat HALELOV
Musylman jurtynyń eń ulyq merekeleriniń birinde Oraldaǵy Qazaqstan halqy Assambleıasy músheleri erekshe qaıyrymdylyq aksııasyn jasady. Aksııa koronavırýs indeti bastalǵannan qaýipti dertpen alysyp, ınfeksııalyq jáne provızorlyq stasıonarlarda kúni-túni eńbek etken medbıkelerdi qoldaýǵa arnalǵan. Aýrýdyń janynda kúni-túni bolatyn, eń aýyr da qaýipti jaǵdaıda qyzmet etetin bul medbıkelerdiń arasynda óz otbasy járdemge muqtaj bolyp júrgen qyzmetkerler de az emes. Assambleıa ókilderi muqtaj jandarǵa kórsetetin dástúrli qaıyrymdylyq sharasyn bul joly aq jeleńdi abzal jandarǵa baǵyshtady.
"Elimizde "Myń alǵys!" atty jalpyulttyq aksııa ótip jatyr. Shynynda da dárigerler men medısına qyzmetkerleri eń qıyn jaǵdaıda jumys isteıdi. Olardyń kópshiligi óz týystary men jaqyndaryn kórmeı qyzmet etýde. Bizdiń Assambleıa quramyndaǵy etnomádenı birlestik ókilderi osy joly biraýyzdan medısına qyzmetkerleriniń otbasylaryna materıaldyq kómek kórsetip, azyq-túlik sebetin taratýdy uıǵardy. Adam balasynyń bir-birine degen meıirimin kúsheıtip, izgilikke, keshirimge shaqyratyn uly meıram kúni barsha jerlesterimdi, sonyń ishinde dáriger qaýymyn quttyqtaımyz", deıdi Batys Qazaqstan oblysy Qazaqstan halqy Assambleıasy tóraǵasynyń orynbasary, hatshylyq meńgerýshisi Ǵaısa Qapaqov.
Assambleıanyń músheleri azyq-túlik sebetterin óz kólikterimen mekenjaıǵa deıin jetkizip berdi.
