MYŃNAN TULPARLAR QATARYNDA ATALDY

Otandyq joǵary bilim berý salasyn synamaıtyn adam joq. Ásirese, sary basylymdar onyń kemistik jaǵyn kóp aıtady. Biraq osy saladaǵy bizdiń qol jetken jetistigimiz az emes. Jýyrda, halyqaralyq “Taıms keız edıýkeıshn” agenttigi álemdegi 500 úzdik ýnıversıtetti atady. Bul nátıjege agenttik eki jyl boıy álemniń 15 myńnan artyq ýnıver­sıtetterin zerttep, sarapshy­lardyń, jumys berý­shilerdiń pikirleri men usynys­taryn saralap, salmaqtaǵannan keıin qol jetkizgen.  Árıne, 15 myńnyń ishinen úzdik dep tanylǵan 500-diń qataryna iligý de ońaı emes, degenmen, Ortalyq Azııadaǵy postkeńestik respýb­lıkalar ýnıversıtetteriniń arasynan onyń qataryna bizdiń L.N.Gýmılev atyndaǵy Eýrazııa ulttyq ýnıversıteti kiripti. Osynyń ózi otandyq bilim berý júıesiniń basqalardan kem emes ekendigin kórsetpeı me? Bul jańalyqqa óz basym qatty qýandym. Shynymdy aıtsam, men bul faktige alǵashynda sene qoı­maı, ýnıversıtet basshylyǵyna habarlasyp, onyń anyq-qany­ǵyn qosymsha anyqtadym. Sóıtse... úzdikter qataryna TMD-dan bes-aq ýnıversıtet ilikken eken. Máskeý men Sankt-Peterbýrgtiń ejelgi ýnıversıtetterinen basqa onyń qataryna Novosibir men Tom qalalarynyń ýnıversıtetteri qosylypty. Besinshisi – bizdiń ýnıversıtet... Osyǵan oraı men mynany aıtqym keledi, eger bizdiń Bilim jáne ǵylym mınıstrligi halyq­aralyq reıtıngke saı bolatyn saraptar júrgizýdi ózderi qolǵa alyp, oqý-bilim prosesin qada­ǵalap otyrsa, bizdiń joo-lar­dyń jetistigi budan da joǵary bolar edi. Ol úshin, árıne, qo­sym­sha qarajat bólýge týra keledi. Al qazir bizdiń joǵary bilim salasyna  bólip otyrǵan qara­jatymyz joǵary talapqa saı dep aıta almaısyń. Máselen, bizdiń Eýrazııa ulttyq ýnıver­sıtetiniń jyldyq bıýdjeti Sankt-Peter­býrg ýnıver­sıte­tinen jeti ese az kórinedi. Mun­daı jaǵdaıda úlken nátıje talap etýdiń ózi artyq. Sonyń ózinde bizdiń bilim berý sala­myz­dyń jetistigi álgindeı bo­lyp otyr. Al eger reıtıngti kóte­rý baǵytynda sharalar qaras­tyrylyp, olar jetkilikti dárejede qarjylandy­rylsa, jetistik budan da zor bola­ry sózsiz. Osynyń ózi, saıyp kel­gende, otandyq bilim salasy­nyń sapasyn arttyrar edi ǵoı. Amanjan JAMALOV, Májilis depýtaty.