Búginde ismer azamat júzden astam tapsyrysty tııanaqty etip oryndap shyqqan. Tutynýshylar tarapynan ókpe-renish, eskertpe bolmapty. Qaıta, alǵystaryn jaýdyryp, talapty jastyń qulshynysy men yntasyn arttyryp qoıǵan.
Maqsat bul isti Balqash qalasy ákiminiń bıznesti damytýǵa arnalǵan grantyn jeńip alǵannan keıin bastapty. Endi ol ilgerileýdiń jaıyn oılap, óz isiniń aýqymyn keńeıtýdi josparlap júrgen kórinedi. Jas kásipker jumysynyń yrǵaǵy syrttan qaraǵanda bylaısha túziledi: keste mashınasynyń baǵdarlamasyna tapsyrys berýshi tańdaǵan eskız júkteledi. Qysqa ǵana jazba nemese sýret salý jarty mınýt ýaqytty alady, al tutas sýretter bir saǵatqa deıin kestelenedi eken.
– Biz ónimge Made in Balkhash degen japsyrmalardy mindetti túrde tigemiz. Bul zattyń qaıda jasalǵanyn kórsetedi. Sondaı-aq tapsyrys berýshiniń ótinishi boıynsha ártúrli sózder men sýretter salamyz, – deıdi ámbebap maman.
Búginde Maqsat bul isti otbasylyq bızneske aınaldyrǵan. Shaǵyn sheberhanasynyń jumys istep turǵanyna jarty jyldaı bolyp qalypty. Eń basty jáne senimdi kómekshisi – anasy Gúlnár Syzdyqova. Ol kisi mınýtyna tórt myń aınalym jasaı alatyn óndiristik tik buryshty stanoktyń qulaǵynda oınaıdy. Bul mashına úsh saǵat ishinde matanyń kesindisin dızaınerlik jeıdege aınaldyra alady eken.
– Eger alańsyz jumys isteıtin bolsaq, kúnine úsh-tórt fýtbolka tigýge bolady. Biz, árıne, eń aldymen sapaǵa mán beremiz. Sondyqtan tek túrik matalaryn paıdalanamyz, – deıdi Gúlnár Syzdyqova.
Qazirgi ýaqytta Maqsattyń fýtbolkalary áleýmettik jeliler arqyly satylady. О́timi jaman emes: búginge deıin júzden astam fýtbolka men qalpaq tutynýshysyn tapqan.
Jaqynda jas kásipker Balqash qalasy ákiminiń bıznesti damytýǵa arnalǵan 2 mln teńge grantyn jeńip aldy. Bul qarjy, árıne, óris keńeıtip, jańa deńgeıge shyǵýǵa múmkindik beredi. Mysaly, buǵan deıin fýtbolkaǵa ǵana keste tigip kelgen Maqsat endi qalpaqsha, kúrte, tipti aıaqkıimge deıin kestemen túrli tańba túsirip, jazý bederleı alatyn bolady. Bul úshin jas kásipker ónerkásiptik keste tigý óndirisin jolǵa qoımaq.
Nesi bar, talapty jastyń Made in Balkhash zatbelgisi elimizdegi tanymal brendterdiń birine aınalyp jatsa, tańdanýǵa bolmas. Sebebi talpynǵan maqsatyna jetpeı tynbaıdy!
Qaraǵandy oblysy,
Balqash qalasy
