Qaıǵysyn izgi isimen jeńildetken

Oqıǵa • 04 Tamyz, 2020

Qaıǵysyn izgi isimen jeńildetken

Qaı kezde bolsyn jastar qoǵamnyń belsendi toby, qozǵaýshy kúshi sanalady. Al qazirgideı qıyn sátterde jastarymyzdyń el isine bel sheshe kirisip, ózderiniń izgilikti is-qımyldarymen kórinýi kóńilge jylylyq uıalatpaı qoımaıdy.

Joldybaı BAZAR

Búgin biz az ǵana ýaqyt ishinde tek Nur-Sultan qalasyna ǵana emes, Bashqurtstanda da tanymal bolǵan elordalyq «Aqbozat» bashqurt etno-mádenı ortalyǵy tóraǵasynyń orynbasary Zakır Bıkmýhametov týraly az-kem sóz qozǵamaqpyz. Elordalyq Qazaqstan halqy Assambleıasyna Zakırdyń kelgenine kóp ýaqyt bolǵan joq. Osy aralyqta ol talaı mádenı-buqaralyq is-sharalarǵa belsene qatysyp júrgen jastardyń birine aınaldy.

Qazirgi tańda biz úshin tek qana densaýlyǵymyz ǵana emes, sonymen qatar rýhymyz synalyp jatyr. Osy oraıda halyq densaýlyǵyna alańdaǵan jastar dárigerlerge, naýqastarǵa kómektesýdi azamattyq paryzy sanady. Naqtylaı aıtqanda jastar ókilderin naýqastar men dárigerlerge kómektesý úshin aýrýhanaǵa erikti sanıtar bolyp barýdy jón dep tapty. Mine, osyndaı sheshim qabyldaǵan jastardyń biri – Zakır.

Zakırdiń ákesi qatty aýyryp qaldy. Ol ákesin aýrýhanaǵa jatqyzǵannan keıin aýyr sátterde eń qymbat adamnyń janynda bolý týraly sheshim qabyldady. Sodan ol medısınalyq tekserýden ótip, Nur-Sultan qalasyndaǵy 1-shi qalalyq aýrýhananyń erikti sanıtary bolyp jumys isteı bastady.

Biraq, úlken ókinishke qaraı, indet Zakırdiń ákesin de aınalyp ótpedi...

Zakır osyndaı úlken qaıǵyǵa moıymastan aýrýhanadaǵy jumysyn tastamaı, erikti túrde sanıtarlyq qyzmetin jalǵastyra berdi. Ol moraldyq jaǵynan qıyn jaǵdaıda júrse de naýqastardy kútý boıynsha kúndelikti jumysyna barlyq ýaqytyn arnady. Eger bir naýqastyń jaǵdaıy túzelip, aýrýy jeńildese, Zakır úshin eńbeginiń esh bolmaǵany.

Osyndaı kúrdeli jaǵdaıda volonter bolý sheshimin erlik, izgilik jáne parasattylyqtyń úlgisi dep aıtýǵa bolar. Bizdiń qarapaıym jas zamandasymyz – Zakır Bıkmýhametov aınalasyna osyndaı jarqyn úlgi kórsete bildi.

Elordalyq Qazaqstan halqy Assambleıasynyń barlyq ıgi isteriniń belsendi qatysýshysy Z. Bıkmýhametov qazirgideı qıyn kezeńde úreıge boı aldyrmaı, sabyrlylyq tanytý, tártipke baǵyný óte mańyzdy dep esepteıdi.

– Meniń zamandastarym osyndaı aýqymdaǵy úlken qaýipke buryn-sondy tap bolǵan joq. Bizdiń halqymyzǵa bul syn-qaterdi túsiný jáne qabyldaý mańyzdy. Sol kezde biz qanshama qıyndyqtardy bastan ótkerip, olardy jeńe bilgen ata-babalarymyzdyń jeńisti de jemisti jolyn sátimen jalǵastyra bilgen bolamyz. Qıyn ýaqytta turaqtylyqty saqtaý kerek, al tártipke baǵyný óte mańyzdy. Úreıge boı aldyrmaý qajet, alaıda bosańsýǵa bolmaıdy, – deıdi.

Zakırdyń belsendi is-áreketi jastar úshin qashanda úlgi dep nyq aıta alamyz. Onyń tańdaǵan joly – eńbek. Endeshe eriktiniń qarapaıym eńbek joly jastar úshin úlgi-ónege bolýy kerek.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz