Aıtýlarynsha, aýdanda quny bir mıllıard teńge turatyn sý platınasy salynǵan. Biraq úsh jyldan keıin iske jaramsyz bolyp qalǵan. Qazirgi tańda platına jumys istep turǵan joq. Senat depýtaty quqyq qorǵaý organdarynyń osy máselege nazar aýdarýyn surady.
Murat Baqtııaruly Ekologııa, geologııa jáne tabıǵı resýrstar mınıstri M. Myrzaǵalıevpen jáne onyń orynbasarlarymen sóılesti. Senator qalyptasqan jaǵdaı týraly aıtyp, osy máseleni jaqyn arada sheshýdi surady, onsyz agrarlar orasan shyǵynǵa batatynyn jetkizdi. Tıisti mınıstrlik 5 tamyzǵa deıin Syrdarııa ózenindegi sý deńgeıiniń tómendeýin boldyrmaý joldaryn qarastyrýǵa ýáde berdi.
Mamandardyń aıtýy boıynsha, bıyl shamamen 90 myń gektar alqapqa kúrish egilgen. Mundaı aýmaqty 3 aı sýarý kezeńinde sýmen qamtamasyz etý qıyn. Senator óz kezeginde sý resýrstaryn únemdeýge múmkindik beretin zamanaýı tehnologııalardy paıdalanýdy usyndy.
Murat Baqtııaruly egin egýshilerge kúrishten bólek sýdy kóp qajet etpeıtin jońyshqa, raps, júgeri jáne baý-baqsha ónimderin ósirýdi usyndy.
Osy rette senator kishi Araldy toltyrý máselesine de nazar aýdardy.
Murat Baqtııaruly óńir agrarlarymen jáne basshylyǵymen kezdesýde: "Bizge kishi Araldy toltyrý úshin de sý qajet. Sýdyń teńizge jetpeı jatqanyn eskersek, kishi Araldyń sý deńgeıi tómendeýi múmkin. Qazirdiń ózinde Qambash kóli jaǵalaýdan 150 metrge sheginip ketti. Qyzylorda Syrdarııaǵa óte táýeldi, sondyqtan kóp sýdy qajet etpeıtin daqyldardy ósirý mańyzdy. Bul baǵytta dıhandar úshin arnaıy baǵdarlama ázirlegen jón", dedi.
Egin alqaptarynan bólek Senat depýtaty aýdandyq aýrýhanaǵa baryp, jergilikti jurtpen tildesti.
