Qazaqstan Respýblıkasynyń Tuńǵysh Prezıdenti qorynyń májilis zalynda kórnekti ázerbaıjan jazýshysy jáne memleket-qoǵam qaıratkeri Iýnýs Ogýzdyń orys tilinde eki kitap bolyp jaryq kórgen «Temirlan» romanynyń tusaýkeseri ótti.
Qazaqstan Respýblıkasynyń Tuńǵysh Prezıdenti qorynyń májilis zalynda kórnekti ázerbaıjan jazýshysy jáne memleket-qoǵam qaıratkeri Iýnýs Ogýzdyń orys tilinde eki kitap bolyp jaryq kórgen «Temirlan» romanynyń tusaýkeseri ótti.
Almatydaǵy «Dáýir» baspasynan jaryq kórgen bul eńbektiń tanystyrylymyna Bakýden roman avtory jáne kórnekti ázerbaıjan jazýshysy ári aqyny, Mahmut Qashqarı atyndaǵy halyqaralyq qordyń quryltaıshysy hám atqarýshy dırektory, qazaq ádebıetimen tyǵyz qarym-qatynas jasap júrgen aýdarmashy Elhan Zal Qarahanly kelip qatysty. Aıta ketý kerek, Elhan Zal buǵan deıin Qazaqstannyń Tuńǵysh Prezıdenti Nursultan Nazarbaevtyń «Qazaqstan joly» kitabyn, sondaı-aq, Oljas Súleımenovtiń óleńderi men Berik Shahanulynyń áńgimelerin ázerbaıjan tiline aýdaryp, kitap etip shyǵartqan belgili qalamger.
Iýnýs Ogýzdyń bul «Temirlan» atty romany – buǵan deıin orys, aǵylshyn, arab jáne álemniń 15 tilinde jaryq kórip, qalyń oqyrmannan joǵary baǵasyn alǵan týyndy retinde de álem ádebıetinde orny bólek shyǵarma. Avtordyń aıtýynsha, bolashaqta bul shyǵarma qazaq tilinde jaryq kórmek. Shyǵarma orys tilinde jaryq kórgenimen, Iýnýs Ogýz baýyrlas Qazaq eli, qazaqstandyq oqyrmandarǵa atalmysh eńbekti tartý etýdi maqsat tutypty.
Tusaýkeser jıynyn jazýshy Berik Shahanuly saltanatty túrde ashyp, kesh qonaqtaryna eki eldiń yntymaqtastyǵy, ádebı baılanystary men mádenı qarym-qatynastary týraly syrly suhbat túrinde júrgizip otyrdy. Kezdesýde ázerbaıjan jazýshysy Elhan Zal Qarahanly, «Alash» ǵylymı-zertteý ortalyǵynyń bas dırektory Haırolla Ǵabjalelov, qalamger Málik Otarbaev, jazýshy-aýdarmashy Gúlzada Myrzahmetova, belgili til mamany, qoǵam qaıratkeri Asyly Osmanqyzy, uıǵyrdyń kórnekti jazýshysy Ahmetjan Áshırı sóz sóılep, osy shyǵarmanyń qundy jaqtary men utymdy jelisine toqtalyp, baýyrlas qazaq-ázerbaıjan elderiniń arasynda ádebı baılanysty jandandyra túsý jóninde pikirlerin ortaǵa saldy.
Qanat ESKENDIR,
«Egemen Qazaqstan».
ALMATY.
