Búgin qazaq jyrynyń adamzat kógine qanat jaıǵan mártebeli mezeti!
Qazaq rýhanııatynyń qubylasyna aınalǵan Abaı qubylysyna erekshe zer salý árqaısymyzdyń buljymas boryshymyz bolsa kerek.
Abaı – bizdiń ónegeli ómirimizdegi basty baǵyt. О́rkenıet órine qaımyqpaı qadam basar kez kelgen ult óziniń adastyrmas jolyn kórnekti tulǵalary arqyly tańdaıdy. Bul turǵyda bizdiń jolymyz – Abaıdyń joly ekenin jaqsy sezingenimiz durys.
Abaı – qazaq kógine máńgi nuryn shashyp turar jaryq juldyz! Abaı – túgel adamzatty júreginiń túbindegi asyl aqıqatqa jetelep bara jatqan dara dańǵyl, bıik murattaryna bastap bara jatqan jaıaý buıdager!
Uly saharadaǵy jalǵyz janartaýdaı munartyp turǵan aqyn bolmysy bizdi únemi ózine shaqyryp keledi. Kári ýaqytpen astasyp, zamanalar alystaǵan saıyn tulǵasy zoraıyp, murasy aıqyndala túsken sherli shaıyr bizdi únemi bildirtpeı baǵyp turǵandaı!
Abaı – álem kitaphanalarynyń kóne sórelerin qos qara tomymen, klassık Muhtar Áýezovtiń «Abaı joly» roman-epopeıasymen qaıystyryp turǵan qaıtalanbas tulǵa!
Abaı – álemniń túkpir-túkpirine eńseli eskertkish bolyp laıyqty ornyqqan oıshyl!
Tobyqty tóńiregine ǵana emes, túgel adamzat júreginiń túbine sham ornatyp, izgilik pen ıman sáýlesin jarqyrata tógip turǵan qyzyl shamshyraq – ol Abaı fenomeni!
Abaı – ótkenimiz ben keleshegimizdiń, jibergen qateligimiz ben jetken jetistigimizdiń, barar baǵytymyz men alar ornymyzdyń aıqyn jolbasshysy!
Biz búgin osydan týra 175 jyl buryn qart Shyńǵystaýdyń eteginde, Eralynyń baı jazyǵynda shyr etken sábı úniniń adamzat daýysyna aınalǵan kúnin merekelep jatyrmyz!
Danyshpan aqyn batys pen shyǵysty, búgin men erteńdi, ómir men óleńdi jalǵap jatqan altyn kópir retinde adamzatqa ortaq!
Abaı – shyndyqtyń shyraǵy, aqıqattyń alaýy!
Búgin biz hakimniń alty qanat aq ordasynda týǵan asyl oılary dúnıejúziniń altyn bosaǵaly aq saraılarynyń ishin erkin aralap, qýatty daýys zoraıtqyshtar arqyly adamzat jadyna umytylmastaı kóshkenine, máńgi ólmes mátinder bolyp mármár tastarǵa qashalǵanyna kýá bolýdamyz!
Abaı joly – Alash joly!
Ultty adastyrmas eski súrleý sheksiz keńistikpen astasyp ketkeli qashan! Sol jolda ózimizdi joǵaltpaýymyz ǵana mańyzdy!
Biz únemi Alash muratyn alǵa bastar Abaı murasyn tereń túısinýimiz kerek!
Abaıdyń ózin ǵana tanyp qoımaı, onyń ómir súrgen rýhanı ortasyn, qoǵam raıyn, ult dıdaryn qosa zerdeleýimiz de ýaqyt talaby!
Abaıdyń aınalasy arqyly ǵana qazaqtyń minezi tolyq ashylady. Abaı-Qunanbaı qarym-qatynasy arqyly ulttyń bıik parasaty túgendeledi!
Abaı-Áıgerim súıispenshiligi arqyly asyl sezimder búr jarady!
Abaı-Ábish meıirimi arqyly urpaq sabaqtastyǵy túsindiriledi!
Bulardyń barlyǵy Abaı jolyna shyǵar birinshi baspaldaq, áýelgi beketter ǵana der edik!
Abaı – bir sózben aıtqanda yntymaq pen birliktiń, izgilik pen kemeldiktiń, bıik parasat pen tereń poezııanyń sımvoly! Ár sózi qadaý-qadaý tirek, tutastyqtyń Týy, meıirimniń móri! «Tolyq adam» tujyrymy – kisiliktiń kilti!
Abaı – qazaqtyń rýhanı qubylasy.
Abaı – dáýir daýysy, Abaı – ýaqyt tynysy!
Abaı – adamdyqtyń aqylgóı asyl ustazy!
Abaı taǵylymyna taǵzym etý – Rýhanı jańǵyrýymyzdyń uly kezeńi!
