Mamandardyń zertteýinshe, bir sý quzǵyny kúnine 700-800 gramm maıqan balyǵynyń shabaqtaryn jep qoıady. Marqakól óńiriniń maqtanyshyna aınalǵan - maıqan balyǵynyń ósip, kóbeıýine aıtarlyqtaı zalal keltirip otyr. Qoryq qyzmetkerleri balyqtardyń ýyldyryq shashý maýsymynda sý quzǵyndarynyń sanyn azaıtý úshin profılaktıkalyq jumystar júrgizgen. Máselen, sý quzǵyndarynyń sanyn azaıtý úshin olardy uıasyna qondyrmaı, shýly daýys shyǵaratyn zattarmen úrkitý jumystary júrgizilgen. Mundaı ádister uıadaǵy jumyrtqalardyń tez sýyp, balapan bolyp shyqpaı qalýyna sebep bolady. Sondaı-aq, orman ınspektorlary sý quzǵynynyń jumyrtqalaryn tesýmen de aınalysýda.
"Marqakól" tabıǵı qoryǵynyń dırektory Tımýr Aıkenovtyń aıtýynsha, eń birinshi kezekte tabıǵatqa onyń ishinde erekshe qorǵalatyn maıqan balyǵynyń kóbeıýine zalaly tımeýi úshin sý quzǵyndaryn sany retteletin jan-janýarlar sanatyna jatqyzý kerek.
"Tabıǵı zańdylyqtar boıynsha sý quzǵyny uıadaǵy jumyrtqasynan balapan shyqpasa, ol jerden aýyp ketedi. Qazir atqarylǵan sharalardyń nátıjesinde Marqakól tabıǵı qoryǵyndaǵy sý quzǵyndarynyń sany aıtarlyqtaı azaıdy. Shamamen 500-600 bas sý quzǵyny bar. Mamandardyń sózinshe, sý quzǵyndarynyń qaptap ketýine birinshi kezekte ańshylarǵa sý quzǵyndaryn atýǵa ruqsattyń joqtyǵy sebep bolyp otyr. Sondyqtan, ol sany retteletin qustardyń sanatyna jatqyzylýy kerek. Tek sonda ǵana ańshylar olardyń artyq sanyn atyp, popýlıasııasyn rettep otyrady",- dedi Tımýr Aıkenov.
Qoryq basshylarynyń sózinshe, bıylǵy balyqtardyń ýyldyryq shashý maýsymy sátti ótken. Ýyldyryq shashýmaýsymy kezinde zańsyz balyq aýlaý deregi kóp tirkelmepti. Naqtysyn aıtqanda, bıylǵy jyldyń 01.05-01.07 aralyǵynda negizgi ýyldyryq shashatyn ózenderde táýlik boıy jumys isteıtin 12 beket qoıyldy.
