Keńes barysynda taraptar pandemııamen kúrestegi tıimdi ózara is-qımyl máselelerine erekshe nazar aýdaryp, onyń óńir ekonomıkasy úshin jaǵymsyz saldaryn eńserý jáne syrtqy ekonomıkalyq qyzmetti jandandyrý máselerin qarastyrdy. Sondaı-aq epıdemııalyq jaǵdaı, bir-birine gýmanıtarlyq kómek kórsetý jónindegi óńirlik yntymaqtastyq, azamattardy shet elderden qaıtarý máseleleri, sondaı-aq ekonomıkalyq utqyrlyq pen iskerlik belsendilikti qalpyna keltirý perspektıvalary da talqylandy.
Qazaqstandyq tarap Japonııa úkimetine pandemııaǵa qarsy kúreste jan-jaqty qoldaý kórsetkeni jáne bizdiń elderimizdiń sanıtarlyq-epıdemııalyq qyzmetteriniń ozyq tájirıbelerdi engizý boıynsha ózara is-qımylyn nyǵaıtýǵa jáne vaksına men jańa medısınalyq preparattardy ázirleý men ǵylymı-praktıkalyq kómek kórsetýge ázirligi úshin rızashylyǵyn bildirdi.
Syrtqy saıası vedomstvolardyń basshylary osy format sheńberinde ózara saýda-ekonomıkalyq is-qımyldy qalpyna keltirýge baǵyttalǵan praktıkalyq kúsh-jigerdi biriktirý týraly sheshim qabyldady. Bul aspektide Japonııanyń ekonomıkalyq jáne tehnologııalyq áleýeti qyzyǵýshylyq týdyrady, ony jalpy Ortalyq Azııa ekonomıkasyn jańǵyrtýda jáne birlesken jobalardy iske asyrý arqyly qoldanýǵa bolady. Keńeske qatysýshylar syrtqy saıasat vedomstvolary basshylarynyń kelesi 8-shi kezdesýi barysynda Japon bıznesiniń qatysýymen saýda, ınvestısııalar jáne agroónerkásiptik keshen salasynda naqty usynymdar ázirleýge kelisti.
Aıta keteıik, «Ortalyq Azııa + Japonııa» dıalogy Japonııanyń bastamasymen shaqyrylǵan. Alǵashqy kezdesý 2004 jyly Nur-Sultanda ótken. Format sheńberindegi yntymaqtastyqtyń negizgi baǵyttary – saıası dıalog, óńirishilik yntymaqtastyqty damytý, bıznesti kótermeleý, zııatkerlik dıalog, mádenı baılanystar. Dıalog aıasynda syrtqy ister mınıstrleriniń kezekti 8-shi keńesin Tokıoda 2021 jyly ótkizý josparlanyp otyr.
