Jańa jylytý maýsymy qarsańynda Nur-Sultanda jeke turǵyn úı sektoryn aralaý bastaldy. Úılerdegi peshterdiń, murjalar men elektr jylytqyshtardyń sapasyn tekseredi, al turǵyndarǵa pesh jabdyqtaryn paıdalaný kezindegi órt qaýipsizdigi erejeleri túsindiriledi.
"Tótenshe jaǵdaılar departamenti jyl saıyn sýyq túskende jáne jylytý maýsymy jaqyndaǵan saıyn órttiń, qaza bolý men jaraqattanýdyń aldyn alý maqsatynda jeke turǵyn úı sektoryn aralaý boıynsha aldyn alý is-sharalaryn júrgizedi. Olar eki kezeńge bólinedi. Birinshisi – 15 tamyzdan 15 qyrkúıekke deıin; ekinshisi -15 qyrkúıekten jylytý kezeńiniń sońyna deıin. Departament qyzmetkerleri aýla aralap, reıdter júrgizedi. Úgit-nasıhat jumystary kúsheıtiletin bolady", – dep habarlady elordalyq TJD.
Peshter men murjalardy ornatý kezinde zań buzýshylyqtar bolǵan jaǵdaıda, úı ıesine olardy joıý boıynsha usynystar beriledi. TJD jylytý maýsymy bastalar aldynda jylytý peshterin paıdalanýǵa daıyndaý qajet ekenin eske salady.
"Birinshi kezekte tútin murjasyn kúıeden, sondaı-aq peshterdiń qatty qyzatyn betterin janǵysh zattardan tazalaý qajet", - dep atap ótti departament ókilderi.
Peshpen jylytylatyn úılerde ýlanýdyń aldyn alý úshin, ýly gaz datchıkteri ornatylady. О́tken jylytý maýsymynda osyndaı qurylǵylarmen 1264 úı jabdyqtaldy, onyń 980-i halyqtyń áleýmettik osal toptarynyń úılerine ornatyldy.
Qys mezgilindegi órtterdiń deni pesh jabdyqtaryn durys paıdalanbaý sebebinen týyndaıdy. Statıstıka boıynsha, ótken jylytý maýsymynda elordada barlyq órtterdiń úshten biri nemese 106-sy jeke turǵyn úı sektorynda oryn alǵan.
