Ekonomıka • 18 Tamyz, 2020

Qazaqstannyń ınvestısııalyq múmkindikteri ızraıldik kompanııalarǵa tanystyryldy

17 ret kórsetildi

Qazaqstannyń Izraıldegi Elshiligi, sondaı-aq  Izraıldiń eksporttyq ınstıtýty jáne «Kazakh Invest» Ulttyq kompanııasy» AQ» birlesip «Qazaqstan-Izraıl ınvestısııalyq jáne iskerlik yntymaqtastyǵynyń jańa kókjıekteri» atty onlaın-konferensııa ótkizdi. Bul týraly Egemen.kz SIM baspasóz qyzmetine silteme jasap habarlaıdy.

Konferensııaǵa aýyl sharýashylyq, jer qoınaýyn paıdalaný, joǵary tehnologııa salalaryndaǵy 60-tan astam ızraıldik kompanııalar, sondaı-aq halyqaralyq ınvestısııalar salasyndaǵy mamandar qatysty. Olardyń qatarynda «Bermad» jáne «Netafim» sý kompanııalary, «Eurotech Communication» telekommýnıkasııa kompanııasy, «Israir» avıakompanııasy, «LR Group» agrotehnologııalyq kompanııasy, «Ol Investments» qarjy kompanııasy jáne t.b. boldy.

О́z sózinde Elshi Satybaldy Burshaqov Qazaqstan men Izraıl arasyndaǵy saýda-ekonomıkalyq yntymaqtastyqtyń negizgi baǵyttaryna toqtaldy. Elshi ızraıldik kásipkerlerdi ınvestısııalyq yntymaqtastyqtyń áleýetin tıimdirek paıdalanýǵa, sondaı-aq «Astana» halyqaralyq qarjy ortalyǵy men arnaıy ekonomıkalyq aımaqtardyń sheteldik ınvestorlarǵa usynyp otyrǵan perspektıvti jobalaryn júzege asyrýǵa qatysýǵa shaqyrdy.

Elshiniń pikirinshe, «Israir» avıakompanııasymen kelissózder barysynda qol jetkizilgen Tel-Avıv pen Almaty arasynda tikeleı reıs ashý týraly kelisim, sondaı-aq taraptardyń qarastyrýynda jatqan Qosarlanǵan salyq salýdy boldyrmaý týraly konvensııa jobasyna qol qoıý máselesi, sózsiz, eki el arasyndaǵy iskerlik baılanystardyń keńeıýine yqpal etetin bolady.

Buǵan jaýap retinde, Izraıl eksport ınstıtýtynyń tóraǵasy Adıv Barýh qazaqstandyq taraptyń bastamalaryn quptaı otyryp, ózi basqaryp otyrǵan mekeme Qazaqstan men Izraıl arasyndaǵy  taýar aınalymyn arttyrýǵa bar kúshin salatynyna sendirip, ol úshin Izraıl kompanııalaryn Qazaqstan usynǵan jobalardy zerdeleýge yntalandyrýǵa daıyn ekendigin jetkizdi.

«Kazakh Invest» basqarma tóraǵasynyń orynbasary Ǵalym О́zbekov konferensııa qatysýshylaryna elimizdiń ınvestısııalyq artyqshylyqtary týraly aıtyp berdi. Ol Izraıl kapıtalyn izdeý men ony Qazaqstanǵa tartýdyń praktıkalyq quraldary týraly, sondaı-aq daǵdarys jáne daǵdarystan keıingi jaǵdaılarda ınvestorlarmen jumys isteý tetikterin qurý týraly pikirimen bólisti.

Ǵ. О́zbekov tarıhı turǵydan alǵanda áıgili Jibek jolynyń boıynda ornalasqan elimizdiń Eýropa men Azııa arasynda, onyń ishinde EAEO jáne «Bir jol, bir beldeý» bastamalary aıasynda úlken tranzıttik áleýetke ıe ekendigine nazar aýdardy.

«Kazakh Invest» ókilderi áleýetti ınvestorlardy Qazaqstan ekonomıkasyna kapıtal jumyldyrýdy salalar turǵysynan bólip, atap aıtqanda aýyl sharýashylyǵyna ınvestısııalaý múmkindikterimen jáne jalpy sheteldik ınvestorlardy memlekettik qoldaý sharalarymen tanystyrdy. Osylaısha, ınvestısııalardy tartýdyń túbegeıli jańa tásilderi anyqtalyp alyndy – bul birtutas qosymsha qun tizbegin qalyptastyrý boıynsha ınvestorlarmen tikeleı jumys. Ekonomıkanyń basym salalaryna salynatyn strategııalyq ınvestısııalar úshin jaǵdaıdyń turaqtylyǵyn qamtamasyz etetin zańnamaǵa túzetýler qalyptastyryldy.

Vebınarǵa qatysýshylar álemdik pandemııa kesirinen engizilgen shekteý sharalary jýyq arada alyp tastalynyp, eki eldiń bıznes-toptaryna iskerlik belsendilikti jańadan bastaýǵa múmkindik bolatynyna úmit bildirdi. Is-shara nátıjesinde aýyl sharýashylyq, kıberqaýipsizdik jáne jer qoınaýyn paıdalaný salalaryndaǵy kompanııalar elimizdegi ınvestısııalyq jobalarǵa qatysýǵa qyzyǵýshylyq tanytty.

 

Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.

Sońǵy jańalyqtar

Almaty mańynda jer silkindi

Aımaqtar • Keshe

Sý aıaǵy qurdymǵa kete me?

Aımaqtar • Keshe

Kók túrkiniń kózi

Tarıh • Keshe

Tólge toly Taıketken

Ekologııa • Keshe

15 mamyr – Halyqaralyq otbasy kúni

Qoǵam • 15 Mamyr, 2021

Semeıde eki jeńil kólik soqtyǵysyp qaldy

Aımaqtar • 15 Mamyr, 2021

Uqsas jańalyqtar