Eki el arasyndaǵy qorǵanys jónindegi kelisimge sáıkes, AQSh tarapy Polshadaǵy áskeriniń sanyn arttyrady. Sondaı-aq Amerıka Qurama Shtattary atalǵan eldi Eýropadaǵy negizgi áskerı ortalyǵyna aınaldyrmaq. «Keńeıtilgen qorǵanys yntymaqtastyǵy kelisimi» dep atalatyn bul qujatqa Polshanyń qorǵanys mınıstri Marıýsh Blashak pen AQSh-tyń memlekettik hatshysy Maık Pompeo qol qoıdy.
«Bul qadam Polshaǵa nemese AQSh-qa qaýip tónse, sarbazdarymyzdyń kez kelgen qıyndyqqa birlese qarsy turýyna kepil bolyp, yntymaqtastyqty kúsheıte túsedi», dedi Polsha prezıdenti Andjeı Dýda qol qoıý rásiminen keıin.
Aq úı basshysy Donald Tramp osy oqıǵaǵa baılanysty málimdeme jasady. «Bul kelisim bizdiń áskerı yntymaqtastyǵymyzdy arttyryp, AQSh sarbazdarynyń Polshadaǵy sanyn kóbeıtip, NATO-nyń áleýetin odan ári kúsheıtedi, Eýropadaǵy qaýipsizdikti qamtamasyz etedi ári demokratııa, erkindik pen egemendikti saqtaýǵa kómektesedi», delingen málimdemede.
Qosymsha sarbaz ákelýden bólek, kelisim aıasynda AQSh-tyń 5-shi armııalyq korpýsynyń Eýropadaǵy bas shtaby osy Polshada ornalaspaq. Sondaı-aq ofıserlik quramnyń 200-ge jýyq ókili de osy elde boryshyn óteıdi.
Qazirgi tańda Polshada AQSh-tyń 4500 sarbazy bar. Esh memlekette olardyń naqty áskerı bazasy ornalaspaǵan. Buǵan deıin Polsha talaı márte óz elinde turaqty áskerı baza ashýǵa ynta bildirgen-di. El bıligi osy arqyly shyǵystan keletin qaýipke tosqaýyl bolýdan úmitti.
«Múmkindigimiz mol, oǵan jetkilikti resýrs ta bar. Áskerdiń qabileti mańyzǵa ıe. Álem qazir burynǵydaı emes», degen M.Pompeo amerıkalyq sarbazdar Polshaǵa ǵarysh, kıberqaýipsizdik, jalǵan aqparatpen kúres salasynda da kómektesetinin jetkizdi.
Polshanyń syrtqy ister mınıstri Iаsek Chapýtovıch AQSh áskeriniń kelýi memlekettiń qorǵanys qabiletin kúsheıte túsedi dep esepteıdi. Onyń paıymdaýynsha, elde kez kelgen sátte qaqtyǵys týyndaý yqtımaldyǵy joǵary.
Ekijaqty qorǵanys jónindegi kelisimniń uzyn-yrǵasy osy. Bir qaraǵanda mańyz aýdararlyq eshteńe joq sekildi kóringenimen, Aq úı bıligi Polshamen áskerı yntymaqtastyqty kúsheıtý arqyly «eki jep, bıge shyǵýdy» kózdegenin ańǵarý qıyn emes.
Polshadaǵy sarbazdarynyń sanyn arttyrý arqyly AQSh Shyǵys Eýropadaǵy óz yqpalyn kúsheıtip, Reseıden keletin kez kelgen qaýipke tosqaýyl bolýǵa talpynady. Onyń ústine, qorǵanys jónindegi kelisim aıasynda amerıkalyq sardarlar Polshanyń birqatar áskerı nysandaryn qoldanýǵa múmkindik almaq. Olar Reseıdi dál ókpe tusynan baqylaýǵa osylaısha qol jetkizip otyrǵandaı.
Álbette, Aq úıdiń mundaı qadamy Kremlge unaǵan joq. Reseı syrtqy ister mınıstriniń resmı ókili Marııa Zaharova osy oqıǵaǵa baılanysty pikir bildirip, amerıkalyq áskerdiń Reseı shekarasyna jaqyndaýy jaǵdaıdy odan ári kúrdelendire túsedi dep málimdedi.
«Mynaǵan taǵy nazar aýdarǵym keledi. Polshadaǵy amerıkalyq áskerdiń sanyn arttyrý qaýipsizdik máselesin sheshpeıdi, qaıta Reseıdiń batys shekarasynda týyndaǵan qıyn jaǵdaıdy odan ári kúrdelendirip, shıelenisti kúsheıtip, kútpegen oqıǵaǵa dýshar etýi múmkin», dedi M.Zaharova.
Polshamen aradaǵy kelisimnen eki apta buryn Vashıngton bıligi Germanııadan 12 myń sarbazyn áketetinin habarlaǵan. Onyń jartysyna jýyǵy NATO-ǵa múshe basqa elderge kóshirilse, qalǵany elge qaıtarylmaq. D.Tramp ákimshiligi buǵan deıin talaı márte Germanııany synap, NATO-daǵy mindetin durys oryndamaı otyrǵanyn jıi kóterip kelgen. Oǵan qosa, nemisterdiń «Soltústik aǵyn – 2» gaz qubyry jobasyna qyzyǵýy da Aq úıge unaǵan joq. Osylardyń bárin eskere kele, D.Tramp Germanııaǵa sarbazdaryn áketý arqyly eskertý jasap qoıýdy jón kórgen syńaıly.
Aıtpaqshy, Maık Pompeo men Andjeı Dýda kelisimge qol qoıylǵannan keıin Polshadaǵy Belgisiz sarbaz eskertkishine gúl shoqtaryn qoıdy. Bir aıta keterligi, bul eskertkish 1920 jylǵy soǵysta Polshanyń reseılik bolshevıkterdi jeńgeni úshin qoıylǵan-dy.
