Tanymal álemdik shoýdyń shırek fınaly tikeleı efırde ótti. Jartylaı fınalısterdi tańdaý NBC saıtyndaǵy kórermenderdiń daýystaryna tikeleı baılanysty boldy. Daýysty tek AQSh-taǵy azamattar ǵana bere aldy. Sondaı-aq birneshe qatysýshy qazylar alqasynyń múshelerinen qosymsha ball jınady.
"Los-Andjeleste qazir menimen birge anam men muǵalimim Natalıa Aleksandrovna bar. Biz óner kórseter aldynda qatty qobaljydyq. Saparǵa shyǵar aldynda óte kóp júkteme boldy. Men qosymsha akademııalyq pedagog Gúlzat Daýrbaevamen vokal boıynsha daıyndalyp, kishkene aýyryp qaldym. Onyń barlyǵy qazir artta qaldy. Qazirgi sáttegi sezimimdi aıtyp jetkizý qıyn. Barlyqtaryńyzǵa qoldaýlaryńyz úshin rahmet. Bul shoýda qandaı keremet atmosfera bar! Munda erekshe shabyttanyp, taǵy bir jańa nárse jasaýǵa umtylasyń. Kelesi týrǵa burynǵysha kún saıyn daıyndalatyn bolamyn!"- dedi Danelııa Tóleshova.
Búgin shoý qatysýshylaryn baspasóz máslıhaty men AQSh-tyń jýrnalısterimen suhbat kútip tur. Shırek fınalda jas ánshi Harry Styles Sign Of The Times ánin oryndady. Kórermender men qazylar alqasy bul joly da Danelııanyń ónerine alǵashqy kezeńdegideı erekshe súısinip, óz oryndarynan turyp qol shapalaqtady.
Danelııa anasymen jáne muǵalimimen AQSh-qa birneshe kún buryn ushyp kelgen. Olar shoýdyń barlyq qatysýshylary úshin mindetti shart - karantındik sharalardy qatań saqtap jatqanyn aıtady.
"Biz ushar aldynda koronavırýsqa test tapsyrdyq. Ushyp kelgennen keıin barlyq basqa qatysýshylar sııaqty mindetti karantın kúnderin ótkizip, taǵy da test tapsyrdyq. Barlyǵynyń dansaýlyq jaǵdaıy jaqsy. Biz qaýipsizdik sharalaryn saqtaımyz, tipti, qonaqúıdegi tamaqtaný da qyzmetkerlermen baılanys bolmas úshin esikke deıin ǵana jetkiziledi", - dedi Danelııanyń muǵalimi Natalıa Chýrakova.
America ' s Got Talent jartylaı fınalynyń kúni men qazaqstandyq oryndaýshynyń kelesi kompozısııasy týraly ázirge málimet joq.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.
