«Qorǵanys mınıstrligi Áskerı klınıkalyq gospıtaliniń búkil ujymyna júrgizgen em úshin alǵysymdy bildiremin. Dárigerler men medısınalyq personaldyń joǵary bilikti maman ekendigi jáne jaqsy daıyndyqtary kórinip turdy. Áskerı dárigerlerdiń naýqastarǵa degen qamqorlyǵy, jaqsy kútimi men izgi qarym-qatynastary da baıqaldy. Dári-dármekter tolyq kólemde jáne úzilissiz berildi. Tamaqtaný da túrli ári qunarly boldy», dep óz oıymen bólisti emdelýshi.
Jalpy, áskerı gospıtalde 800-ge jýyq adam, onyń ishinde áskerı qyzmetshiler emdelip shyqty. Shamamen 40% naýqas syrqattyń aýyr belgisimen qabyldanǵan, sonymen qatar naýqastardyń jartysynan kóbi koronavırýstyq ınfeksııadan bólek qan aınalymy júıesi, tynys alý organdary, endokrındik patologııa sekildi syrqattary bar egde jastaǵy adamdar boldy. Áskerı dárigerlerdiń aldynda mindetterdiń biri retinde indettiń asqynýyn aldyn alý jáne emdeý júrgizý edi.
«Bizdiń gospıtal epıdemııaǵa qarsy qatań rejimde jumys isteý boıynsha úlken tájirıbe jınady. Medısınalyq personal atalǵan patologııasy bar naýqastarmen jumys isteýge daıyn, dárigerler men medbıkeler ózderiniń mindetterin jaqsy biledi, talap etiletin qaýipsizdik sharalaryn saqtap, sonymen qatar túrli kútpegen jaǵdaılarda áreket etýge ázir. Biz táýlik boıy jumys atqardyq. Barlyq dárigerler men medbıkeler asa joǵary kásibılikterin kórsetip, tanytqan qaısarlyqtarynyń arqasynda biz indetti jeńe bildik. Búgin biz sońǵy naýqasty emdep shyǵardyq, bul barlyq medısınalyq personal úshin úlken qýanysh», dedi Almaty qalasy Áskerı klınıkalyq gospıtaliniń bastyǵy Samat Sársenbaev.
Áskerı-medısınalyq mekeme bastyǵynyń aıtýynsha, gospıtaldiń materıaldyq-tehnıkalyq bazasy naýqastardyń ornalasýy men tamaqtaný máselelerimen qosa alǵanda emdik-dıagnostıkalyq prosesti tolyq kólemde júrgizýge múmkindik beredi.
Eske sala keteıik, 3 tamyzdan bastap Reseıden kelgen áskerı dárigerlermen birlesken jumys bastaldy. COVID-19 indetinen emdeý men tájirıbe almasý boıynsha birshama máseleler pysyqtaldy.
Aıta ketý kerek, kóptegen áskerı medısınalyq mekemeler koronavırýs indeti anyqtalǵan naýqastardy emdeýge jáne oqshaýlaýǵa qatysatyn emdik-profılaktıkalyq mekemeler tizimine engizilgen bolatyn. Medısınalyq mekemeler karantındik, provızorlyq jáne ınfeksııalyq stasıonarlardyń talaptaryna sáıkes qaıta qurylǵan bolatyn.
