I.Keıta memlekettik telearna arqyly óz laýazymynan bas tartatynyn jáne ulttyq keńesti taratatynyn málimdedi. Sonyń aldynda ǵana kóterilisshiler prezıdent pen premer-mınıstr Býbý Sısseni tutqyndaǵany týraly aqparat taraǵan edi.
ORTM arnasy arqyly halyqqa úndeý jasaǵan I.Keıta merziminen buryn qyzmetinen ketýiniń sebebin túsindirip, «bıligimdi saqtap qalý úshin qan tógilgenin qalamaımyn. Sondyqtan prezıdenttik mandatymnan bas tartýǵa sheshim qabyldadym», dedi.
Prezıdenttiń ókilettigin toqtatýy sherýshilerdi bir serpiltip tastady. The Guardian basylymynyń habarlaýynsha, narazylar qazirgi úkimetten sharshaǵanyn jetkizgen. Kóp uzamaı kóterilisshilerdiń basshylary telearna arqyly málimdeme jasady. «Biz bılikti ustap turǵanymyz joq, biz eldegi turaqtylyqty qamtamasyz etemiz. Bárimiz birlesip qana eldiń ulylyǵyn qaıtara alamyz», dedi Malı áýe kúshteri qyzmeti basshysynyń orynbasary Ismaıl Vage. Sondaı-aq ol el shekarasy jabylǵanyn, keshki 9-dan tańǵy 5-ke deıin komendanttyq saǵat engizilgenin habarlady.
«Bul qadam az ýaqyt ishinde Malıdegi bılik pen halyq arasyndaǵy senimdilikti qalpyna keltirip, kúndelikti ómirimizdi jaqsy jaǵyna jeteleıtin áleýetti ınstıtýt qalyptastyratyn jalpy saılaý ótkizýge múmkindik beredi», dedi I.Vage.
Jalpy, Malıdegi ahýaldyń shıelenisýi maýsymda bastalǵan-dy. Oqıǵanyń órshýine bıylǵy parlamenttik saılaý túrtki boldy. Úkimetke narazylar kóshege shyǵyp, prezıdenttiń qyzmetinen ketýin talap etken. El prezıdenti I.Keıta sherýshilermen kelissózder júrgizip, saılaýdy qaıta ótkizýge ýáde bergen. Biraq bul narazy tarapty toqtatqan joq.
О́tken aptada Katı aımaǵyndaǵy sarbazdar qoldaryna qarý alyp, joǵary shendi ofıserlerdi tutqyndady. Úkimetke narazylar olardyń áreketin qup kórip, ádilet mınıstrliginiń ǵımaratyn órtedi.
Oqıǵanyń bulaı órshýine alańdaǵan premer-mınıstr B.Sısse sarbazdardy qarýyn tastaýǵa shaqyrǵan. Biraq kóterilisshiler alǵan betinen qaıtqan joq. Osylaısha, olar prezıdent I.Keıtany, premer-mınıstr B.Sısseni jáne qarjy mınıstri Abdýlla Daffeni tutqyndady.
Malıdegi jaǵdaıǵa halyqaralyq qoǵamdastyq ta alańdap otyr. Oqıǵaǵa baılanysty BUU Qaýipsizdik Keńesi jabyq esik jaǵdaıynda jıyn ótkizgen. Aıta keterligi, Malıde BUU beıbitshilik mıssııasynyń 15600 ókili qyzmet etedi.
BUU Bas hatshysy Antonıo Gýterrısh Malıdegi jaǵdaıdy konstıtýsııalyq tártip pen zań erejesin óreskel buzý dep aıyptady. Afrıka uıymynyń tóraǵasy Mýssa Fakı Mahamat ta kóterilisshilerdiń áreketin zań buzýǵa balap, prezıdent pen premer-mınıstrdi bosatýǵa shaqyrdy.
Fransııanyń syrtqy ister mınıstri Jan-Iv le Drııan mundaı aýyr oqıǵany Fransııa qatań aıyptaıtynyn jetkizdi. Qytaıdyń syrtqy ister mınıstri Beıjiń bıligi úkimetti kúshpen aýystyrýǵa qarsy dep habarlady. Eýropalyq odaq kóterilistiń Malıdi ǵana emes, óńirdegi búkil ahýaldy qıyndatatynyn málimdedi.
Bir qyzyǵy, I.Keıtanyń qazirgi taǵdyry Malıdiń buǵan deıingi prezıdenti Amadý Týrege óte uqsas. 2012 jyly osy elde áskerı kóterilis bolyp, Týre qyzmetinen ketken edi. Kóterilis saldarynan eldegi ahýal qıyndap, birqatar aımaqta ekstremıstik baǵyttaǵy qarýly toptar kúsheıe tústi.
Keıinirek Fransııa áskeriniń kómegimen ekstremısterdi talqandaýdyń sáti túsken. Degenmen Ibrahım Keıtanyń basshylyǵy kezinde atalǵan toptar qaıta kúsh jınaǵan syńaıly. Onyń ústine, keı toptardyń DAISh terrorıstik uıymyna qatysy bar ekeni aıtylady. Halyqaralyq qoǵamdastyqtyń qaýiptenip otyrǵany da osy.
