Atalǵan aýrýhanada COVID-19 ben pnevmonııa dıagnozy qoıylǵan birde-bir naýqas qalmady. Endi №4 qalalyq klınıkalyq aýrýhanasynyń juqpaly aýrýlar bólimshesine dezınfeksııalyq jumystar júrgiziledi. Sondaı-aq aýrýhananyń medısınalyq qyzmetkerleri eki apta boıy oqshaýlanyp, sodan keıin ózderiniń beıindi bólimshelerine – burynǵy jumystaryna oralady.
«Bir apta boıy temperatýram 39,8°C-qa deıin kóterilip, keýde tusymdy qatty aýyrsyndym. Aýa jetispeýshiligi, qurǵaq jótel, álsizdik pen entigý boldy. Aýrýhanaǵa ózdigimnen qabyldaý bólmesine kelip, tekserilgenimde dereý KT jasap, aýrýhanaǵa jatqyzdy. Maǵan eki jaqty polısegmenttik pnevmonııa dıagnozy qoıyldy. Dárigerler qamqorlyq tanytyp, ıneksııalar men aspa ýkoldardy óte muqııat qoıdy. Eki aptadan keıin qaıtadan ıis seze bastadym», deıdi «Tórttik» stasıonarynda emdelgen Jumadil Ákimbekov.
Bıyl 24 maýsymda Almaty qalasynyń Qoǵamdyq densaýlyq saqtaý basqarmasy men Taýarlar men kórsetiletin qyzmetterdiń sapasy men qaýipsizdigin baqylaý departamentiniń birlesken buıryǵy negizinde №4 QKA-da 25 tósektik oryn bar juqpaly aýrýlar bólimshesi ashyldy. Sol kezde josparly medısınalyq kómek kórsetý toqtatyldy, fızıoterapııa jáne ońaltý bólimshesin qaıta beıindeý esebinen kovıdtik bólimshe quryldy. Klınıkanyń eriktileri qatarynan 44 adamnan turatyn medısınalyq qyzmetkerler alyndy.
«Jańa juqpaly aýrýlar bólimshesine jumysqa qabyldaý týraly habarlamadan soń kópshiligi oılanbastan ótinish berdi. Bastapqyda 14 dáriger jumys istedi, onyń ishinde 4 reanımatolog, qalǵan 10 dáriger qurama komanda: travmatolog, ınfeksıonıst, terapevt, reabılıtolog dáriger, FGDS dárigeri, ÝDZ dıagnostıkasy bar. Qalǵany medbıkeler men sanıtarlar, sondaı-aq eriktiler. Bólimshede 25 tósektik orynǵa jáne 5 reanımasııalyq orynǵa eseptelgen, aýrý órshigen shaqta shyndyǵynda 70-ke deıin aýyr naýqas jatty», deıdi juqpaly aýrýlar bólimshesiniń meńgerýshisi Nurjan Baıbahov.
Pandemııa dárigerdiń ómirin «deıin» jáne «keıin» dep bóldi. Nurjan Nurmuhanbetuly – bilikti travmatolog-ortoped, hırýrg, endoprotezdeý bólimshesinde jumys isteıdi, býyndardy endoprotezdeý mamany. Juqpaly aýrýlar bólimshesiniń qyzmetkerleri otbasynan oqshaýlanyp, qonaqúıge kóshti. Alǵy shepte jumys isteıtin dárigerlerdi jumysqa aparyp, alyp qaıtý, restoratorlar klýbynan ystyq tamaq, demeýshilerden azyq-túlik sebetteri berilip, erekshe jaǵdaı jasaldy.
Osy ýaqyt ishinde bólimshede 126 adam emdeldi. Qalalyq klınıkalyq aýrýhanaǵa pnevmonııamen aýyrǵan aýyr naýqastar jatqyzyldy. Reanımasııa, anestezıologııa jáne qarqyndy terapııa bólimshesiniń aǵa medbıkesi Aıjan Omarovanyń daǵdysy men tájirıbesi ınfeksııalyq bólimshede jumys isteýde óz paıdasyn tıgizdi, ol da eriktiler qatarynda boldy. Sońǵy naýqas shyqqan kúni Aıjan osy ýaqytqa deıin tapsyrǵan barlyq PTR testi teris nátıje kórsetkenin atap ótti.
«Osy ýaqyt aralyǵynda bizge óte qıyn boldy. Pasıentterdiń basym bóligi tynys alýy qıyndaǵan, aýyr halde boldy, barlyǵy qabyldaý bólimshesi arqyly kelip tústi. О́te aýyr jaǵdaıdaǵy naýqastar dereý reanımasııa bólimine jatqyzyldy, aýyrlyǵy ortasha jáne PTR testi oń bolǵandar bizdiń juqpaly aýrýlar bólimshesine jiberildi. Qyzmetkerlerge úlken psıhoemosıonaldy aýyrlyq tústi, naýqastar moraldyq turǵydan sharshap, baıbalam salǵandar da boldy, keıbirinde emdeý prosesi óte qıyn jaǵdaıda ótti. Biz olardy tynyshtandyryp, bir-birimizdi jigerlendirip, baqylap júrdik. Keıinirek, ınfeksııa tómendegen kezde, jeńistiń jaqyndaǵanyn túsindik. Endi qalypty ómirge qaıta oralyp jatyrmyz», dedi №4 QKA juqpaly aýrýlar bólimshesiniń aǵa medbıkesi Aıjan Omarova.
Sońǵy naýqasty shyǵarǵannan keıin juqpaly aýrýlar bólimshesiniń medısınalyq qyzmetkerleri qorǵanys kostıýmderin sheship, dárigerler eki aptalyq ózin ózi oqshaýlaýǵa ketedi, adamdardyń ómiri úshin qyzý kúresten keıingi demalys ýaqyty keldi. Karantınnen keıin PTR testin mindetti túrde tapsyrý qajet, eger teris nátıje bolsa, olar ózderiniń mamandandyrylǵan bólimshelerine burynǵy jumysyna oralady.
Aıta keteıik, koronavırýs ınfeksııasynyń taralý qaýpi jaǵdaıynda Almaty qalasynyń medısınalyq uıymdary epıdemııaǵa qarsy qaýipsizdik talaptaryn saqtaı otyryp, karantın rejiminde jumys isteýdi jalǵastyryp otyr.
ALMATY
