Baspa ókilderiniń aıtýynsha, kitapty qazaq jáne aǵylshyn tilderinde oqýǵa bolady, ıaǵnı bir basylymda eki tildegi nusqa qatar berilip otyr.
"Balalar planshet pen telefonnan aırylmaıdy, kitaptan qashady. Sonyń kesirinen boıynda psıhologııalyq teris ózgerister bolyp jatady. Muny qumarlyqqa teńer edim. Kóp ata-ana ul-qyzyna kitap oqýdyń paıdasyn túsindire almaı qınalady. "Tentek balaqaıdyń kúndeligi" komıks-romany osyndaıda jaqsy kómekshi bolmaq. Bul eńbekti balalar súısinip oqıdy jáne basqa kitapty oqýǵa degen qulshynys paıda bolady. Al túpnusqa mátinniń qatar berilýi aǵylshyn tilin jaqsartady", - deıdi baspa basshysy Raısa Saıranqyzy Qadir.
Raısa Qadir 2019 jyly Jeff Kınnımen kezdeskenin jáne avtordyń Qazaqstanǵa kelýge nıetti ekenin aıtty.
"Kitaptyń budan bólek taǵy birneshe bólimin shyǵarǵan soń avtordy arnaıy shaqyryp, oqyrmandarǵa erekshe kesh syılaımyz dep úmittenemin", - deıdi baspa basshysy.
"Tentek balaqaıdyń kúndeligin" qazaq tiline aýdarǵan – Nárkez Berikqazy. Redaktory – Nazgúl Qojabek.
Kitaptyń bas keıipkeri – qarapaıym oqýshy Greg Hefflı. Ol basynan ótken alýan túrli qyzyq oqıǵany kúndelik retinde jazyp júredi. Gregtiń sýrettegenin oqyǵan ár bala ózin tanıdy, sabaq alady.
"Mátini jeńil, sýretteri tartymdy, keıipkerlerinen balalyq ańǵaldyq pen tazalyq lebi esip turǵan kitapta ár oqýshynyń basynan ótetin, ata-anamen, muǵalimdermen, synyptastarmen aradaǵy qatynas, jaqsy men jamannyń baıybyna barý, bardy bar, joqty joq dep túsiný evolıýsııasy sıpattalǵan", - deıdi Raısa.
Eske sala keteıik, "Steppe & WORLD Publishing" baspasy balalarǵa arnalǵan Jýlııa Donaldsonnyń "Aqyn Qoıan" jáne "Grýffalo", Erık Karldyń "Qomaǵaı Juldyzqurt", Elen Delforjdyń "Mama", sondaı-aq "Anna Franktiń kúndeligi" sekildi kitaptardy qazaq tiline aýdaryp, shyǵarǵan. 2020 jyly baspa Joan Roýlıńtiń "Hárrı Potter men pálsapa tas", "Hárrı Potter men jasyryn bólme" kitaptaryn usyndy. Qazir "Hárrı Potter" serııasyna kiretin qalǵan bes kitap aýdarylyp jatyr.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.
