Daý bylaı bastaldy. Tanymal Fortnite oıyny baǵdarlamasyn jasaǵan Epic Games kompanııasy Google jáne Apple-diń tólem júıesindegi komıssııalyq aqynyń qymbat ekenine narazylyq tanytyp júrgen. Qazirgi tańda bul ústemeaqy 30 paıyzdy quraıdy. Keıinnen kompanııa óziniń tólem júıesin jasap shyǵardy. Sóıtip, Epic Games eki kompanııany taqyrǵa otyrǵyzyp ketti. Buǵan qarsy qadam retinde Apple óziniń dúkeninen Fortnite oıynyn múldem óshirip tastady.
The Guardian basylymynyń habarlaýynsha, Microsoft-tyń basshylyq qyzmetindegi Kevın Gammıl arnaıy málimdeme jasap, Epic Games-di qoldaıtynyn jetkizgen.
«Epic Games-tiń Unreal Engine tehnologııasy kóptegen oıyn jasaýshylar úshin mańyzdy. Olardyń qatarynda Maıkrosoft ta bar. Apple-diń kompanııamen kelisimdi buzýy jáne tehnologııany qoldamaýy keleshekte oıyn jasaýshylarǵa da, oınaıtyn turǵyndarǵa da keri áserin tıgizedi», dep jazdy K.Gammıl.
Apple-diń ashýy qatty. Kompanııa 28 tamyzdan bastap Epic Games-diń App Store-daǵy akkaýntyn joıyp tastaýdy josparlap otyr. Biraq ekijaqty kelissóz júrgizip, mámilege kelse, Apple basshylary ustanymdaryn ózgertýi múmkin.
Jalpy, Microsoft-tyń resmı túrde Apple-ǵa qarsy shyǵýy beker emes. Taıaýda «Eppl» basshylyǵy «Maıkrosfotqa» tıesili xCloud strımdik qyzmetin buǵattap tastaǵan edi. Bul árıne, Bıll Geıtstiń kompanııasyna unaǵan joq. Qysqasy, IT salasyndaǵy alpaýyt eki kompanııanyń arasynan qara mysyq júgirip ótti.
