Aldyńǵy aqparattarda habarlaǵanymyzdaı, daıyndyǵy joq týrıster tobynyń taýǵa shyǵýy qaıǵyly jaǵdaıǵa ákeldi. Saıram-О́gem ulttyq tabıǵı parkiniń aýmaǵynda Qasqasý aýylynan 30 shaqyrym jerde 5 adamnan turatyn top teńiz deńgeıinen 4236 metr bıiktikte ornalasqan "Saıram" muzdyǵyna shyqty. Taýda qar jatqan, odan da joǵary kóterilý úshin taǵy 1 táýlik qajet boldy. Eshqandaı qural-saımandarmen jabdyqtalmaǵan, tájirıbesiz jáne daıyn emes toptyń alǵa jyljýyna múmkin emes edi. Sondyqtan olar tómen túsýge sheshim qabyldady. Túsý kúrdeli emestuǵyn, biraq toptyń daıyn emes músheleri bir sátte qatelik jiberdi. Atap aıtqanda, 1981 jyly týǵan azamatshanyń abaısyzda aıaǵy taıyp, qulap ketti. Oǵan kómektesý áreketteri sátsiz aıaqtaldy. Nátıjesinde, áıel qardyń erýi saldarynan paıda bolǵan taý shyńyndaǵy jaryqtardyń birine qulap qaıtys boldy.
Atalǵan jaıtqa quramynda 10 adam bar Shymkent qalasynyń TJD Jedel-qutqarý jasaǵynyń eki toby qıyn jaǵdaıda "Saıram" muzdyǵynyń basynda qaıtys bolǵan 1981 jylǵy azamatshanyń denesin izdestirý jáne shyǵaryp alý jumystaryn júrgizdi. Bul kúrdeli operasııaǵa Shymkent qalasynyń alpınızm, sporttyq týrızm jáne muzǵa órmeleý federasııasynyń 6 alpınısi tartyldy.
25 tamyz kúni saǵat 14.50-de qutqarýshylar alpınıstermen birge qardyń erý saldarynan paıda bolǵan muzdyqtyń jaryqtaryna qulap, qaıtys bolǵan áıeldiń denesin taýyp aldy. Tabylǵan deneni alý prosesi óte qıynǵa soqty. Kez kelgen ýaqytta qar erip, jaryqshaqty toltyrýy múmkin edi. Onyń tereńdigi 10 metrden asatynyn, eni 50 sm ekenin atap ótken jón. Tar jaryqshaqta 6 metr deńgeıde turyp qalǵan marqumnyń denesin shyǵarý arnaıy qural-jabdyqtardy qoldana otyryp júzege asty. Qaıtys bolǵan azamatshanyń denesi tómen túsirilip, polısııa qyzmetkerlerine tapsyryldy. Al sol kúni zardap shekken 1978 jyly týǵan er adamnyń jaǵdaıy búginde qanaǵattanarlyq.
Tótenshe jaǵdaı departamentiniń ókilderi taýǵa shyǵar aldynda, tájirıbeli jolserikti birge alyp júrýlerin mindetteıdi. Tosynnan týyndaǵan oqys oqıǵa kezinde bilim men uqyptylyq, jaýapkershilik mańyzdy ekenin atap ótedi. Eń aldymen, jabdyqqa, qural-saımandarǵa, kıim men aıaq kıimge, baılanysqa nazar aýdaryńyz. Taýǵa joryq jasaǵan kezde óz baǵdaryńyzdy mindetti túrde tirkeý, naqty koordınattardy bilý qajet. Al qaýipsizdik erejeleriniń saqtalýy taýdaǵy jazataıym oqıǵalardy aldyn alady.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.
