Nur-Sultan qalasynyń áýejaıynda áskerı dárigerlermen saltanatty kezdesý ótti. Atalǵan kezdesýde Qorǵanys mınıstriniń orynbasary general-maıor Rýslan Shpekbaev quttyqtaý sóz sóıledi.
«Osy ýaqyt ishinde bizdiń medısına qyzmetkerleri qoıylǵan mindetterdi laıyqty oryndap, sheteldik áriptesteriniń tarapynan oń baǵalandy. Sizderdi belgilengen mindetterdiń oryndalýymen shyn júrekten quttyqtaımyn. Barshańyzǵa myqty densaýlyq, otbasylaryńyzǵa amandyq, qyzmette tabys tileımin», dep lebizin bildirdi qorǵanys vedomstvosy basshysynyń orynbasary.
Lıvanda qazaqstandyq dárigerler hırýrgııalyq, travmatologııalyq jáne terapevtik naýqastardy emdeýge jumyldyryldy. Kún saıyn dárigerlik-meıirbıkelik brıgadalar tekserýler men konsýltasııalar, qajetti dári-dármekpen emdeý is-sharasyn júrgizdi. Áskerı dárigerler ártúrli jastaǵy naýqastardy emdedi. Onyń ishinde kishkentaı balalar men eresekter dárigerlerdiń kómegine júgindi. Eń qart naýqasyń biri sol jaq jambas súıegi synǵan 90 jastaǵy er adam boldy. Qarııaǵa eki tarap mamandarynyń kúshimen ota sátti júrgizildi. Áskerı dárigerler barlyǵy 635 naýqasty qabyldap, 73 emdelýshige ota jasaldy. Sonymen qatar Beırýt áskerı gospıtaline Qazaqstan tarapynan dári-dármek jáne medısınalyq múlik túrinde gýmanıtarlyq júk tapsyryldy.
«Lıvandyqtar bizge dán rıza. Biz qaıtyp bara jatqanda olar Qazaqstan Respýblıkasyna, Prezıdentimizge úlken alǵys bildirdi. Jergilikti turǵyndar bizdi jyly qabyldady. Áskerı gospıtal men mýnısıpaldyq aýrýhanalarda jumys isteý barysynda biz úlken tájirıbe jınadyq», dedi QR QM Bas áskerı klınıkalyq gospıtali bastyǵynyń ǵylymı-hırýrgııalyq jumys jónindegi orynbasary, jetekshi hırýrg, medısına qyzmetiniń polkovnıgi Asqar Marýfov.
Sonymen qatar jumys barysynda qazaqstandyq áskerı dárigerler lıvandyq áriptesterimen ózara is-qımyl jasap, birlesken emdik is-sharalar júrgizip, qundy tájirıbe almasty. Áskerı dárigerler elimizge attanar tusta Lıvan Qarýly Kúshteri Bas áskerı-medısınalyq basqarmasynyń bastyǵy, general Djordj Iýssef jáne áskerı gospıtal bastyǵy general Abýdahır Nasımmen kezdesý ótti. Kezdesýge qatysýshylar tájirıbe almasý men eki elde áskerı medısınany damytý boıynsha odan ári yntymaqtastyq máselelerin talqylady. Sondaı-aq Lıvan tarapy kórsetken kómegi úshin bizdiń dárigerlerimizge zor alǵysyn bildirdi.
Aıta ketý kerek, áskerı dárigerler QR Prezıdenti – QR QK Joǵarǵy Bas qolbasshysy qoıǵan mindetti laıyqty oryndady.
