Basqarý quqyǵynan aıyryla tura, býynyna taraǵan alkogoldiń áserinen qaıta rólge otyrǵan júrgizýshiler polıseılerdi alańdatyp otyr. SQO PD bastyǵynyń orynbasary Eńbek Sembınniń aıtýysha, mundaı faktiler zańdy ǵana emes, qorshaǵan ortasyndaǵy adamdardy da elemeıtindikterin kórsetedi.
"Ishimdikti táýir kóretinder jolǵa shyqqan saıyn adamdardyń ómiri men densaýlyqtaryna qaýip tóndiredi", – deıdi PD bastyǵynyń orynbasary Eńbek Sembın. – Bıylǵy jylǵy 11 qańtardan qylmystyń atalǵan túri úshin jaýapkershiliktiń qatańdatylǵanyn avtojúrgizýshilerge taǵy bir ret eskertkendi jón dep esepteımin. Endi, negizgi jazadan bólek, qylmyskerler avtokólik basqarý quqyǵynan ómir boıyna aıyrylady. SQO-da 11 qańtardan beri osyndaı 29 sot sheshimi qabyldandy. Kóbine bas bostandyǵynan shekteý úkimi shyǵarylady.
Eki jaǵdaıda óndiris QR Qylmystyq kodeksiniń 346-baby 2-bóligi (Kólik quraldaryn basqarý quqyǵynan aıyrylǵan jáne alkogoldik, esirtkilik jáne (nemese) ýytqumarlyq masań kúıdegi adamnyń kólik quralyn basqarýy, sol sııaqty kólik quralyn basqarýdy osyndaı adamǵa berý nemese kólik quralyn osyndaı adamnyń basqarýyna jol berý) boıynsha júrgizildi.
Atalǵan bólim materıaldyq zalal nemese densaýlyqqa jeńil zııan keltirgen jaǵdaıda qolanylady. Máselen, aqpanda Qyzyljar aýdanynyń 29 jastaǵy turǵyny “Chelıabi-Novosibir” tas jolynda óziniń “Audi-80” kóligimen “Lada 217030” avtomashınasyn basyp ozamyn dep eki jylǵa bas bostandyǵynan aıyryldy. Shilde aıynda onyń 37 jasar jerlesine qatysty sot ótti, ol qonaqqa kelgen tanysymen ishimdikke toıyp alyp, tanysynyń “VAZ 21144” avtokóligin tizgindep, aýdarǵan. SQO-da jyl basynan QR Qylmystyq kodeksiniń 346-baby boıynsha 51 fakti anyqtaldy.
