Adam ómirindegi eń ıgi isterdiń biri – muqtaj jandarǵa qamqorlyq jasaý. Qarajat "1000 teńgege – baspana" jobasy aıasynda jınalady. Respýblıka boıynsha barlyq óńirde qordyń eriktileri jumys isteıdi. Olar óńir boıynsha muqtaj otbasylardy anyqtap, satyp alynatyn baspanalar bazasyn daıyndaıdy. Sondaı-aq ártúrli is-sharalar uıymdastyryp, jınalǵan qarajatty esepshotqa aýdaryp otyrady.
Qaıyrymdylyq qorynyń negizgi 6 múshesi bar. Atap aıtsaq, Gúlmıra Muqanqyzy, Alǵadaı Ábilǵazyuly, Ardaq Bekzatuly, Azamat Elýbaıuly, "Nur-Múbárák" Islam ýnıversıtetiniń doktoranty, qordyń keńesshisi Qýat Qabdolda. Mine, osy komıssııa kómekke muqtaj adamnyń jaǵdaıymen jiti tanysyp shyqqan soń baryp sheshim qabyldaıdy. Jalpy kómekke zárý otbasynyń jaıy 1 aı kóleminde tekseriledi. Sodan soń qordyń quryltaıshylary qatysqan jalpy jıynda aqyldasyp, kimderge beriletini sheshiledi. Satyp alynǵan úı nemese jer telimi áleýmettik jelide jarııa túrde kórsetiledi.
Máselen bıyl Almaty oblysy boıynsha 18 baspana berilgen. Muny qordyń Taldyqorǵan óńiri boıynsha basshysy Amangeldi Tolamısov atap ótti.
"Aqjan jáne Ernar esimdi el azamattarynyń arqasynda 10 páter muqtaj jandarǵa tabystalsa, osy sońǵy 4 aıda 8 otbasy baspana baqytyna keneldi. Jaıyq Tazabekuly, Daryn Sáliimjanov, Ǵabıt Chýkeev, Talǵat Beıbit, Erlan Qasymhanov jáne Mıras Muhametshárip esimdi jigitter bizben birge belsendi qyzmet etýde. Osy quramdaǵy Taldyqorǵandyq eriktiler de qyrýar jumystar atqardy. О́ńir boıynsha qordyń tanymaldylyǵy artyp keledi. Biz kiltti tapsyrý úshin arnaıy Pekın olımpıadasynyń júldegeri Nurbaqyt Teńizbaev, aıtysker aqyn Jandarbek Bulǵaqov jáne karateden álem chempıony Mereı Súıinov sekildi respýblıkaǵa tanymal azamattar shaqyrdyq", – deıdi A.Tolamısov.
Igi is jasaýda qaıyrymdy jandardyń eńbegi eren. Belsendilik tanytqan jaqsy adamdardyń arqasynda talaı jyl páter jaǵalap júrgen otbasynyń endi óz baspanasy bar. Jaqynda Taldyqorǵan qalasyndaǵy "Jastar" saıabaǵynda eńbek etetin batyr anaǵa shańyraq kiltin "Qareket" qaıyrymdylyq qorynyń oblystaǵy músheleri jáne aıtysker aqyn, "Alataý" gazetiniń bas redaktory Aıtaqyn Bulǵaqov tabystady.
"Hareket" qory elimizdiń barlyq qalalary men aımaqtarynda qaıyrymdylyq isimen belsendi aınalysyp keledi. Batyr anaǵa berilgen baspana respýblıka boıynsha 275-shi úı.
Jyldar boıy armandaǵan baspanasyna qol jetkizgen kópbalaly ana qýanyshtan kózine jas alyp, barsha qaıyrymdy janǵa alǵys aıtty.
"Jyrtyq úıdiń Qudaıy bar". Joldasym ómirden ótken soń barlyq jaýapkershilik óz moınyma artyldy. Taǵdyr ońaı emes qoı. Bul balalarymnyń nesibesi. Eki qyzym turmysta. Kenjem 4 jasta. Osyndaı qýanysh meniń otbasymda bolyp jatqanyna áli de sene alar emespin. Men úshin tosynsyı boldy. Eń bastysy úmit úzbeý kerek. Qaıyrymdylyq qoryna, halqyma myń alǵysymdy bildiremin. Qýanyshymda shek joq", – deıdi Raýshan Mombekova.
Qaıyrymdylyq jasaý qazaqtyń qanynda ejelden bar qasıet. Asyl dinimiz de muqtaj jandarǵa jaqsylyq jasaýǵa buıyrady. Olaı bolsa, jaqsylyq jasap jarysaıyq, aǵaıyn!
