TAÝ TULǴALY ESKERTKIShI BOI KО́TERDI QANYShTYŃ

Kerekýge jan-jaqtan, Almaty men Astanadan ǵalymdar, akademıkter, aqyn-jazýshylar, Parlament Májilisiniń depýtattary, Baıanaýyldan, alystaǵy eldi mekenderden jurt kóp jınaldy. Oblys ortalyǵyndaǵy bıik tas tuǵyrǵa uly ǵalym, akademık, ultymyzdyń birtýar uldarynyń biri Qanysh Imantaıuly Sátbaevtyń alyp eskertkishi ornatyldy. Qanysh aǵamyzdyń tas tuǵyrǵa qonǵan taý tulǵaly eskertkishine aıtysker aqyn asqaq úndi asyl sózderimen shashý shashyp, saltanatty rásimniń qýanyshyn molyqtyra tústi. Qanysh aǵanyń kókte qalyqtaǵan rýhy dem bergendeı me, eskertkishtiń ashylýyna jınalǵan barsha halyq erekshe bir kóńil kúıde júrgendeı. – Bul kún bizder úshin qasterli, tarıhı-taǵylym­dyq máni bar úlken qýanysh dep bilemin. Eskertkish ashylǵan saltanatty sáttiń bizdiń jadymyzda jattalyp, urpaqtar jalǵastyǵyna aınalatynyna senim mol. Qanysh aǵamyzdyń ǵulama beınesi ózimiz tuǵyrǵa qondyrǵan qyrandaı áýeleı bersin! – dedi oblys ákimi Baqytjan Saǵyntaev óz sózinde. Budan keıingi sóz kezegin qoǵam qaıratkeri, aqyn Kákimbek Salyqovqa berildi. Uly tulǵanyń óz halqynyń ortasyna qaıta oralǵandaı áserde qaldyrǵanyn, ǵulamanyń ǵumyry sońynda ósip kele jatqan urpaqtarymen ǵasyrlyq muraǵa aınalatynyn jetkizdi. Akademık Murat Jurynov eskertkishtiń ashylýyna jınalǵan Kereký jurtshylyǵyn quttyqtap: Eskertkishteriń qut ákelsin! – degen jaqsy lebizin bildirdi. Biz muny Pavlodar qalasynda halqymyzdyń batyr-baǵlan ul-qyzdaryna arnalǵan eskertkishter kóbeıe bersin degen tilek turǵysynda uqtyq. Budan keıin oblys ortalyǵynda qýanyshty toıdyń, jaqsy áserdiń jalǵasy Estaı aqyn atyndaǵy qalalyq Mádenıet saraıynda jalǵasty. Ǵulama ǵalymnyń eskertkishi ashylýyna oraı Kerekýge kelgen sátbaevtanýshy ǵalym, ınjener-metallýrg, jazýshy Medeý Sárseke, Parlament Májilisiniń depýtaty Kenjeǵalı Saǵadıev, akademık, fılosofııa ǵylym­dary­nyń doktory Jabaıhan Ábdildın, senator Qýanysh Sultanov, qoǵam jáne memleket qaıratkeri Myrzataı Joldasbekov, Kákimbek Salyqov aǵalary­myz tórden oryn alyp, búgingi sharaǵa oraı tanymdyq áńgimelerimen jınalǵan jurtshylyqty baýrap aldy. Kópten beri qazaqy rýhanı áńgimege shóldegen keń zal ishi bir sát erkin tynystap, salıqaly, syndarly suhbatqa den qoıypty. “Eskertkish qoıý degen ol kósheni kórkeıtý emes, bul adam janyn kórkeıtý, urpaqqa úlgi berý, sizderdiń elderińizdi Qanysh eli dep ataǵan Medeýge rahmet”, dedi aqyn Kákimbek Salyqov. Parasatty oı, salıqaly sóz saptap, jurtty uıytqan Myrzataı Joldasbekov Qyrǵyzstanda bolyp jatqan jaǵdaıdy aıta kelip, “Eldiń, jerdiń, táýelsizdiktiń dámi máńgi tátti bolsyn, osy eldi, jerdi kúzetip otyrǵan asyl aǵaıyn, sender aman bolyńdar”, dep aq tilek aıtty. “Qanyshtyń uly beınesi jaqsy isterge bastasyn! Úlken toı jalǵasyn tapsyn!” dedi óz sózinde Qanysh aǵamyz týraly jaqsy estelikter aıtqan Medeý Sárseke. Qanysh Sátbaev eskertkishiniń avtory – músinshi, Shoqan Ýálıhanov atyndaǵy syılyqtyń laýreaty Olga Prokopeva. Eskertkish turǵan tuǵyr Jambyl oblysynan jetkizilgen Qordaı granıti. Bıiktigi – 8,5 metr. Osylaısha, Pavlodar qalasynda ǵulama ǵalym Qanysh Sátbaevtyń janyn kórkeıtetin jaqsy shara júzege asty. Farıda BYQAI, Pavlodar.