Qorǵanys mınıstri, general-leıtenant Nurlan Ermekbaev áskerı qyzmetshilerge «Qazaqstan Konstıtýsııasyna 25 jyl», «Qazaqstan halqy Assambleıasyna 25 jyl» medaldaryn tabys etti.
«Elimizdiń Negizgi Zańynyń maǵynasynda teńdik pen turaqtylyq qamtamasyz etile otyryp, búkil qazaqctandyqtardyń múddeleri qamtylǵan, – dedi mınıstr óz sózinde. – Ata Zańnyń ásker úshin mańyzy zor».
Qorǵanys vedomstvosynyń basshysy táýelsiz Qazaqstannyń konstıtýsııalyq qurylysyn qorǵaý jáne qorǵanys qabiletin nyǵaıtý úshin Qarýly Kúshterdiń áleýeti jyl saıyn artyp kele jatqanyn atap ótti. Kún saıyn jaýyngerlik daıyndyqtyń sapasy men qarqyny jańa deńgeıge kóterilip, áskerlerdiń tehnıkalyq jabdyqtalýy jetildirilýde, áskerı qyzmetshiler áleýmettik kepildiktermen qamtamasyz etilýde.
«Otan qorǵaý jolynda konstıtýsııalyq borysh pen jeke senimge súıene turyp, áskerdiń áleýetti bolýy qajet. Sanaly túrdegi tańdaýdy basshylyqqa ala otyryp, Qarýly Kúshter árdaıym óziniń basty maqsaty – Otany, halqy, Prezıdenti men Elbasyǵa adal bolýy kerek!», dep atap ótti mınıstr.
Qazaqstan Respýblıkasy Prezıdenti – QK Joǵarǵy Bas Qolbasshysynyń jarlyqtarymen Qarýly Kúshterdiń 260 áskerı qyzmetshisi men qyzmetkeri medalmen marapattaldy. Qorǵanys mınıstriniń buıryǵymen 38 adamǵa gramota tabystaldy.
Qarýly Kúshterdiń áskerı bólimderi men quralymdarynda da bir ýaqytta Konstıtýsııanyń mereıtoıyna arnalǵan saltanatty sharalar ótkizildi.
Merekelik jıyndar kezinde karantın sharalary saqtalyp, qashyqtyq rejimde ótti.
Elimizdiń Prezıdenti Qasym-Jomart Toqaev Konstıtýsııanyń 25 jyldyǵyna arnalǵan halyqaralyq konferensııada sóılegen sózinde: «Qazaqstan Konstıtýsııasynda álemdik quqyqtyq oıdyń ozyq jetistikterimen ushtasqan qazaq halqynyń san ǵasyrlyq baı tájirıbesi jáne danalyǵy kórinis tapqan», dedi.
