"Iskerlik keńestiń mindeti - AQSh Saýda palatasynyń keńeıtilgen platformasy arqyly eki el arasyndaǵy ekonomıkalyq baılanysty odan ári tereńdetý", dep habarlaıdy SIM taratqan derekkózde.
Respýblıkanyń Syrtqy ister mınıstrliginiń habarlaýynsha, keńes tóraǵasynyń qyzmetin Qazaqstan ekonomıkasyndaǵy eń iri ınvestor bolyp tabylatyn "Shevron" kompanııasy atqarady.
Keńestiń hatshylyǵy aǵa vıse-prezıdent Hýsh Choksıdiń jalpy basshylyǵymen AQSh Saýda-ónerkásip palatasynyń arnaıy aýmaqtyq departamentinde ornalasady.
Habarlamada aıtylǵandaı, Qazaqstan men AQSh arasyndaǵy taýar aınalymy jylyna shamamen 2 mıllıard dollardy quraıdy, bul rette ekonomıkanyń aýyl sharýashylyǵy, energetıka, taý-ken jáne ınfraqurylym sııaqty salalarynda ózara saýdanyń odan ári ósýine úlken múmkindikter bar. Qazirgi ýaqytta Qazaqstanda 700-den astam amerıkandyq kompanııa jumys isteıdi. «Qazaqstan-Amerıka bıznes qaýymdastyǵynyń AQSh-tyń Saýda palatasyna kirýi bıznes qaýymdastyqty osy mańyzdy jáne strategııalyq qatynastardy damytý úshin qajetti quraldarmen qamtamasyz etedi", dep málimdedi Shevron Eýrazııa-Tynyq muhıty prezıdenti Naıdjel Hırn.
"Biz AQSh-tyń Saýda-ónerkásip palatasynda Qazaqstan-Amerıka Iskerlik keńesiniń ashylýyn Qazaqstan men AQSh arasyndaǵy saýda-ekonomıkalyq seriktestikti keńeıtýge qýatty serpin beretin jáne eki elde jańa jumys oryndary men múmkindikterdiń ashylýyna yqpal etetin tarıhı oqıǵa retinde qaraımyz. Ortalyq Azııanyń jetekshi ekonomıkasy retinde Qazaqstan Qurama Shtattardyń senimdi seriktesi bolyp qala beredi jáne amerıkandyq kompanııalarmen ózara tıimdi yntymaqtastyqty odan ári damytýǵa nıetti", dep qosty Qazaqstannyń AQSh-taǵy Elshisi Erjan Qazyhanov.
AQSh Saýda-ónerkásip palatasy 3,5 mıllıonǵa jýyq amerıkandyq kompanııalardyń, 3 myń aımaqtyq palatalardyń múddelerin biriktiredi jáne olardyń 90-nan astam ókildikteri bar.
