Estimegen elde kóp. Bul tásildi Katonqaraǵaı aýdany, Qaıyńdy aýylynyń turǵyny Arman Shaıahmetov qoldanyp otyr. Ol úıiniń syrtqy qabyrǵasyna kóldeneńdeı qaǵylǵan samyrsynnyń jińishke butaǵyna jan-tánimen senedi. Senbegende, bir ret te aldap kórmegen eken.
Sonda qalaı boljaıdy deısiz ǵoı. Kádimgi qýrap qalǵan aǵash belgilep qoıǵan mólsherden kóterińki tursa, kún ashyq bolady, al aspandy ala bult torlap, kún jaýa qoımaıtyndaı bolsa, álgi aǵash ortaǵa qaraı túsedi eken. Iilip tómen tússe, eki kúnnen keıin jańbyr quıatyn kórinedi.
Keı-keıde kókten jańbyr tilegen aýyldyqtar «kelin sálem salyp tur ma?» dep ázildep te qoıady.
Kún raıyn bulaı boljaýdy Arman Shaıahmetov baıaǵy zamanda osy aýyldaǵy kónekóz ormanshynyń úıinen kóripti. Al óz úıiniń qabyrǵasyna keıin ǵana ornatqan. Alǵashynda kezdeısoqtyq shyǵar dep eki jaqtaǵy qabyrǵaǵa eki shybyq qaǵyp tastapty. Bir qyzyǵy, ekeýi bir ýaqytta birdeı kóterilip, birdeı túsedi. Muny kórgen kórshi aýyldyń ormanshylary da osy ádispen aýa raıyn boljap júr qazir.
Biraq qýraǵan samyrsynda tabıǵattyń qandaı tylsym syry bar ekeni beımálim.
Shyǵys Qazaqstan oblysy
