«Rýhanı jańǵyrý» QQDI basqarmasynyń tóraǵasy Danııar Esınniń pikirinshe, Joldaý memlekettik basqarý júıesindegi jańa sheshimderdiń katalızatory bolýy tıis. Bıyl kóptegen baǵyttardaǵy qundylyqtar qaıta qarastyrylǵan jyl boldy. Halyqqa arnaǵan Joldaýynda Memleket basshysy daǵdarystan shyǵý sharalaryna, memlekettik apparat júıesin jetildirýge jáne qazaqstandyqtardyń áleýmettik jaǵdaıyn jaqsartýǵa erekshe nazar aýdarǵan.
«Basty nazar aýdaratyn nárse – barsha azamattardyń belsendiligi men sanamyzdyń jańǵyrýyn qamtamasyz etý. Barlyq sheshimder halyqtyń qajettiliginen týyndap otyr. Atap aıtqanda, shaǵyn jáne orta bıznesti qoldaý, aımaqtardy damytý, baspana máselesi syndy áleýmettik kómek, otbasylyq-demografııalyq jaǵdaıdy jaqsartý, bilim deńgeıin kóterý, ekologııalyq saýattylyqty arttyrý keleli máselelerdiń barlyǵy qamtylǵan. Osylardyń bárinen azamattyq qoǵam men memleket arasyndaǵy baılanystyń kúsheıip kele jatqanyn kórýge bolady. Sondyqtan bulardyń barlyǵyn birlese otyryp sheshýimiz kerek», dedi D.Esın.
Qasym-Jomart Toqaev aldaǵy jyldardaǵy memlekettik damýynyń negizgi maqsattaryn aıtyp ótti. «Rýhanı jańǵyrý» QQDI Qoǵamdyq prosesterdi zertteý ortalyǵynyń jetekshisi Gaýhar Mysaevanyń pikirinshe, Joldaý azamattardyń barlyq syndarly máselelerine der kezinde nazar aýdaratyn «Halyq únine qulaq asatyn memleket» konsepsııasynyń negizinde quryldy.
«Joldaý barlyq salany qamtyǵan ári tereńdete túsindirilip, naqty qadamdary kórsetilgen. Qazaqstandyq qoǵamnyń evolıýsııalyq ózgerý baǵyty, koronakrızısten qutqarý joldary, ǵalamdyq trendterdiń aq-qarasyn ajyratý máseleleri durys kóterilgen. Jalpy, Joldaý «Halyq únine qulaq asatyn memleket» tujyrymdamasynyń jalǵasy retinde qoǵamnyń túıtkildi máselelerin sheshýge túrtki bolýy tıis», dedi G.Mysaeva.
Sarapshylardyń pikirinshe, barlyq azamattardyń áleýmettik jaǵdaıyn jaqsartýǵa baǵyttalǵan jańa ekonomıkalyq baǵytqa da erekshe nazar aýdarǵan jón. Ol 7 qaǵıdadan turady: ıgilikter men mindettemelerdi ádiletti bólý, shaǵyn jáne orta bıznesti qoldaý, ádil básekelestik, ekonomıkanyń tehnologııalyǵy, adam kapıtalynyń damýy, jasyl ekonomıka, memlekettik sheshimderdiń dáleldiligi jáne qoǵam aldyndaǵy jaýapkershilik. Joldaýǵa ún qosqan «Jastar» ǵylymı-zertteý ortalyǵynyń dırektory Aıan Sakoshev Prezıdenttiń tapsyrmalary tez ári naqty sheshimderdi qajet etetinin aıtty.
«Koronavırýstan keıingi daǵdarys búginde qoǵamnyń qaı salasynda bolmasyn jańa ózgeristerdi qajet etetinin kórsetip jatyr. Bul memlekettik basqarýǵa da qatysty. Sondyqtan Memleket basshysynan qoǵamdy alańdatqan barlyq saýaldarǵa jaýap alyp, naqty sheshim joldaryn bildik. Sondaı-aq áleýmettik mańyzdy salalardy qoldaý jumystary odan ári jalǵasatyndyǵy da qýantady», dedi A.Sakoshev.
Joldaýda qoǵamdyq kelisim men halyqtyń áleýmettik jaǵdaıyna da erekshe kóńil bólingen. Olardyń arasynda azamattyq qoǵamnyń 2025 jylǵa deıingi damý konsepsııasyn jasaý máselesi bar. Esterińizge sala keteıik, Prezıdent elimizdegi ár altynshy otbasynyń balaǵa zar bolyp júrgenin aıtyp, ajyrasýlardyń 20 paıyzǵa jýyǵy sonyń kesirinen bolatynyn atap ótti.
«Otbasylyq saıasat turǵysynan alǵanda birinshi kezekte otbasylyq-demografııalyq jaǵdaıdy kóterý máselesin qoldaımyn. Osyǵan oraı «Ańsaǵan sábı» baǵdarlamasy elimizdegi balaǵa zárý otbasylarǵa úlken kómek bolady dep senemin», dedi osy oraıda «Rýhanı jańǵyrý» QQDI Otbasylyq ınstıtýtty zertteý ortalyǵynyń jetekshisi Áıgerim Áshimova.
